“Öz komandamı təbrik edirəm. Oyunun sonuna kimi bizi gərginlikdə saxladıqları üçün hər iki kollektivə minnətdaram. Tərəflərdən heç biri səhv etmək istəmirdi. Bu cür oyuna heç vaxt rast gəlməmişdim”.

Futbolmedia.az xəbər verir ki, bu sözləri “Sumqayıt”ın baş məşqçisi Samir Abasov Misli Premyer Liqasının 22-ci turunda “Zirə”yə qarşı keçirilən oyundan (0:0) sonra mətbuat konfransında deyib.

O bildirib ki, yeganə qol matçın taleyini həll edəcəkdi: “Qol vursaydıq, qələbəni əldən verməzdik. Yaxud inanmıram ki, qapımızda top görsəydik, geridönüş edə bilərdik. Çünki çox təzyiqli oyun idi. Əvvəldən də futbolçulara tapşırmışdıq ki, maksimum dərəcədə konsentrasiyalı olsunlar və səhv etməsinlər. Düzdür, bəzi anlarda səhvlər olur. Bu, olmalıdır. Amma ümumi götürdükdə, hər iki komanda eyni cür oynadı. Məqsəd uduzmamaq idi. Bunun da öhdəsindən gəldik”.

Mütəxəssis heç-heçəni komandası üçün yaxşı nəticə sayıb: “Sıx qrafikdə oynasaq da, futbolçularım bu çətinliyin öhdəsindən gəldilər. Bu gün komandam bütün gücünü meydanda qoydu ki, məğlub olmasın. “Sumqayıt” üçün səfərdə “Zirə” kimi komandadan 1 xal almaq yaxşı nəticədir”.

“Sumqayıt”ın çalışdırıcısı hər iki komandanın penaltidən yararlana bilməməsini həyəcanla əlaqələndirib: “Hər iki komandanın penaltini qaçırması futbolçuların nə qədər həyəcanlı olmalarına işarədir. “Zirə” haqqında danışa bilmərəm. Öz futbolçum barədə deyə bilərəm ki, bəlkə də özlüyündə düşünüb ki, bu penalti matçın müqəddəratını həll edəcək. Deyərdim ki, bərbad penalti idi. Komandaların heç biri 11 metrlik cərimə zərbəsi ilə bağlı qərara etiraz etmədi. Ona görə də referilərin düzgün qərar verdiyini düşünürəm”.