"Zədəli oyunçularımız var deyə, rotasiyalar edə bilmirik. Bəzi oyunçularımıza çox güc düşür. Uzun səfər idi, yol amili də var idi. Bütün çətinliklərə baxmayaraq, ikinci hissənin ilk 10 dəqiqəsini çıxmaq şərtilə komanda yaxşı oynadı. Komandadan razı qaldıq. Düzdür, qələbə qazanmaq istəyirdik, amma əlimizdən çıxdı. Bir xala da şükür".

Futbolmedia.az xəbər verir ki, bu sözləri "Sumqayıt"ın məşqçisi Mübariz Orucov Misli Premyer Liqasının 15-ci turunda "Turan Tovuz"la (2:2) oyundan sonra keçirilən mətbuat konfransında deyib.

"İkinci hissənin ilk 10 dəqiqəsində konsentrasiya itkinliyi idi, ya nə idi...Rəqibin də təzyiqi oldu. Diqqətsizlikdən iki qol buraxdıq. Amma sonradan komanda yenidən toparlandı" - deyə o bildirib.

M.Orucov qələbəni əldən vermələri ilə bağlı söyləyib: "Günahkar axtarmağa ehtiyac yoxdur. Səhv olubsa, hamımızındır. Komanda pis oynamadı, normal çıxış etdi. Rəqibin qol vurduğu 10 dəqiqə ərzində nə baş verdiyini oyunu analiz edəndə baxacağıq. Hansı səhvlər etdiyimizi görəcəyik. Soyuq başla hamısını analiz edəcəyik".

O, daha sonra vurğulayıb: "2:0 udduğumuz oyunda sonradan 2:2 olursa, üç xalın əldən çıxmağına üzülürük. İkinci hissə başlayan kimi ardıcıl iki qol buraxıb, oyunu 2:2 başa vurursansa, onda da bir xalın sevinci var".