"İlk qələbəmizi qazanmaq istəyirdik. Oyuna heç də pis başlamamışdıq. İkinci hissədə rəqibin bir əks-hücumu qolla nəticələndi. Futboldur, hərə bir oyun sistemi seçir. Müdafiədə daha diqqətli idilər, daha çox idilər. Müdafiəni yarmaqda problemlərimiz göründü. Qarşıdakı oyunlara baxacağıq. Çalışacağıq ki, xallar qazanaq".

Futbolmedia.az xəbər verir ki, bu sözləri "Səbail"in baş məşqçisi Mahmud Qurbanov Azərbaycan Premyer Liqasının 2-ci turunda evdə "Turan Tovuz"a 0:1 hesabı ilə uduzduqları oyundan sonra keçirilən mətbuat konfransında deyib.

O, hakim idarəçiliyi ilə bağlı elə bir iradının olmadığını bildirib: "Oyun zamanı olur, bəzi epizodlar mübahisəli idi. Düşünürəm ki, orada fərqli qərarlar qəbul etmək lazım idi. Hakimlər də səhv edir".

Mütəxəssis "Turan Tovuz"un yaxşı müdafiə olduğunu vurğulayıb: "Biz də istədiyimiz oyunu oynaya bilmədik. Əsas da cinahlarımız fəal deyildi".