"Komandaya, məşqçilər heyətinə təşəkkür edirəm. Layiqli qələbə qazandıq. Həm çempionatda dördüncü yeri, həm də kuboku nəzərdə tuturam. Bütün azarkeşlərimizi təbrik edirəm".

Futbolmedia.az xəbər verir ki, bu sözləri "Qəbələ"nin prezidenti Fariz Nəcəfov söyləyib.

Onun komandası bu gün Azərbacan kubokunun finalında "Neftçi"yə qalib gələrək (1:0) kuboku qazanıb. F.Nəcəfov həmin görüşdən sonra jurnalistlərin suallarını cavablandırıb.

O, komandanın heyətini qoruyub-saxlamağın çətin olduğunu deyib: "Çox çətindir. Amma komandanın əsas sütununu qorumağa çalışacağıq".

Klub prezidenti yaxında komandanın baş məşqçisi Elmar Baxşıyevlə müzakirələr aparacaqlarını deyib: "Bununla bağlı yaxın günlərdə baş məşqçi ilə görüşəcəyik. Gedən futbolçuların yerinə yenilərini transfer etmək məcburiyyətindəyik".

F.Nəcəfov bildirib ki, büdcə ilə bağlı dəyişiklik yoxdur: "Xeyr. Ciddi bir dəyişiklik yoxdur".