“Turan Tovuz”un baş məşqçisi Ayxan Abbasov “Neftçi” ilə kubok oyunundan sonra bəzi mütəxəssislərin onun taktikasını tənqid etməsinə münasibət bildirib.

Futbolmedia.az xəbər verir ki, o, Misli Premyer Liqasının 32-ci turunda "Zirə" ilə görüşdən sonra (3:1) açıqlamasında tənqidlərə hörmətlə yanaşdığını bildirsə də, bəzi mütəxəssislərə cavab verməyi də unutmayıb:

“Neftçi” ilə səfər oyununa necə hazırlaşdığımızı heç kim bilmir. Bilirəm ki, bəziləri bizi qınayır. Buna normal yanaşıram. Oyundan sonra müzakirələr olmalıdır. “Neftçi” ilə oyunda 70-ci dəqiqəyə kimi hər şey yaxşı gedirdi, hücuma da çıxırdıq. Hücumda çoxala bilməməyimizin səbəbi rəqib idi. Lakin 70-ci dəqiqədən sonra oyunun stressi öz sözünü dedi, futbolçularımız o yükü daşıya bilmədilər. Bəzi mütəxəssilərin fikirləri mənə ağır gəlir. Çünki həmin mütəxəssislər “Turan Tovuz”dan güclü komandalarda işləyiblər, amma hücum futbolunu görməmişik. Üstəlik, həmin komandaları 1-ci dəstəyə salıblar. Bu gün oyun qurtarandan sonra rahat şəkildə “mən olsaydım, hücum futbolu oynadardım” demək... Bir qədər bu fikirlər adama təsir edir. Qalan hər kəsin fikrinə normal yanaşıram”.