“Neftçi”nin yarımmüdafiəçisi Qustavo Klisman jurnalistlərin suallarını cavablandırıb.

Futbolmedia.az xəbər verir ki, 27 yaşlı braziliyalı futbolçu Misli Premyer Liqasının 8-ci turunda “Neftçi”nin “Qarabağ”la 3:3 hesablı heç-heçə etdiyi oyun barədə danışıb.

– Oyunla bağlı fikirləriniz necədir?

– Əlbəttə, buradan bir xalla getdiyimizə görə üzülürük. Çünki üç xal bizdə idi, sonda əlimizdən çıxdı. Amma buna baxmayaraq, komanda yoldaşlarıma göstərdikləri oyuna və əzmkarlığa görə təşəkkürümü bildirirəm. Meydanda əlimizdən nə gəldisə, etdik. Amma futboldur, belə şeylər olur.

– Qələbə qazanmaq üçün “Neftçi”yə nə çatmadı?

– Bunu indi təhlil etmək çətindir. Düşünürəm ki, bu barədə daha sakit başla cavab vermək olar.

– İki iddialı komandanın hər biri bir xal qazandı. Bunu “Neftçi” üçün uğurlu nəticə saymaq olar, yoxsa itirilmiş xallar?

– Biz hər oyuna qələbə üçün çıxırıq və çalışırıq ki, bunu meydandakı oyunumuzla da göstərək. Bəzən istəyirsən, amma sonda alınmır. Üzülürük, amma irəliyə baxmaq lazımdır.

– Azarkeşlər haqqında nə deyə bilərsiniz?

– Bu gün atmosfer mükəmməl idi. Fürsətdən istifadə edib onlara təşəkkürümü bildirmək istəyirəm. Onlar bu gün meydanda 12-ci oyunçumuz kimi özlərini göstərdilər. Düşünürəm ki, hər oyunda bizi dəstəkləsələr, uğurlarımız daha çox olar. Onların dəstəyi mənə meydanda yaxşı mənada çox təsir edir.

– Bugünkü oyununuz karyeranızdakı ən yaxşı çıxışlardan biri sayıla bilərmi?

– Mənim mövqeyim elədir ki, hər oyunda qol vurmaq şansım olmur. Amma bu gün belə böyük oyunda iki qol vurmaq fürsətim oldu və bu, məni sevindirir. Lakin bu iki qolu qələbəmizə, üç xala dəyişərdim.

– Ötən tur “Sabah”la qarşılaşmısınız. İki əsas rəqibə qarşı ardıcıl oyun keçirmək nə dərəcədə çətindir?

– Hər iki rəqib yaxşı keyfiyyətli oyunçulardan ibarət idi. Biz də öz oyunumuzla göstərdik ki, onlardan geri qalmırıq və sona qədər mübarizə aparacağıq.