"Sumqayıt"ın baş məşqçisi Samir Abasov Misli Premyer Liqasının 13-cü turunda "Neftçi" ilə heç-heçə etdikləri matçdan (2:2) sonra mətbuat konfransı təşkil edib. Futbolmedia.az xəbər verir ki, o, əvvəlcə matçla bağlı fikirlərini bölüşüb:

- Oyun gərgin keçdi. Sizin suallarınız daha çox olar. Marağınızın hardan qaynaqlandığını bilirəm. İstəmirəm ki, futbolçularımın belə əziyyət çəkdiyi və heç-heçə etdiyi oyuna kölgə salım. İşlərimiz çoxdur. Bizim oyunumuz bu deyil. Bu qədər boşluqdan sonra sən də nələr etməlisən. Komanda bu vəziyyətdə yaxşı oynadı. Səbuhi Abdullazadə, Murad Xaçayev istiliyi ola-ola oynadı. Oyundan tez-tez düşürdülər. Azarkeşlərimiz möhtəşəm idi. Bizim futbolumuz daha gözəl olacaq. "Sumqayıt"ın rəqibləri üçün nə olacağını görəcəksiniz.

- Əsas olan futbolçularımın dediklərimi dərk etməyidir. "Turan Tovuz"la səfərdəki oyun sönük keçdi. Düzdür, rəqib qazanmışdı, amma biz də udsaydıq, eyni sözləri deyərdim.

- "Sumqayıt"ın bu oyununu zəif təsir bağışlayan "Neftçi" rəhbərliyinə bir mesaj kimi qəbul etmək olar?

- "Neftçi"yə nəyisə sübut etmək fikrim yoxdur. Mənim "Neftçi" ilə əlaqəm qalmayıb. Bu gün qələbə qazana bilərdik. Vaxt lazımdır. Heç kimə ismarıc göndərmək istəmirəm. Oyuna digər matçlardakı kimi hazırlaşmışdıq.

- Aydın Bayramovun oyununda geriləmə hiss olunur. Bu, rəqabətsizlikdən qaynaqlanır?

- Mən bura gələndə artıq vəziyyət belə idi. Aydına bir şey olsa, bəlkə də İlnura yol açılar. Hər şeyi axarına buraxaq. Qışda qapıçı məsələsinə mütləq baxacağıq.

- Regekampfla mübahisə etməyinizin səbəbi nə idi?

- Bu. iki kişinin arasında olan söhbətdir. Bunu açıqlamaq istəmirəm. Qırmızı vərəqə gözləmirdim. Həddindən artıq əsəbiləşmişdim.

- Son dəqiqələrdə qaçırılan epizodlarda hansı hissləri keçirdiniz?

- Tutub onu döyərdim (gülür).