“Gərgin və maraqlı oyun alındı. Meydanda mübarizə gördük. Futbolçularda əzm və istək var idi. Rəqib səhvləri bağışlamadı. Onları qələbə münasibətilə təbrik edirəm. İşimizə davam etməli və səhvləri düzəltməliyik. İnanıram ki, hər şey yaxşı olacaq və bundan da yaxşı "Neftçi" görəcəyik".

Futbolmedia.az xəbər verir ki, bu sözləri "Neftçi"nin baş məşqçisi Samir Abasov Azərbaycan Premyer Liqasının 15-ci turunda "Qarabağ"a 1:2 hesabı ilə uduzduqları oyundan sonra keçirilən mətbuat konfransında deyib.

"Gilyerme Pato çox yaxşı oyun sərgilədi. Halbuki onu pisləyirdilər. Hər bir oyunçuya vaxt lazımdır. İnanıram ki, digər futbolçuların da oyunu düzələcək. Meydanda uduzmaq istəməyən iki komanda var idi. Təəssüf ki, qələbə qazana bilmədik. Komandamın göstərdiyi oyun başlanğıcdır, bizə ümid verir. Digər məqamları da düzəldə bilsək, hər şey daha yaxşı olacaq. Oyunla yanaşı, istək və əzm də lazımdır. Kubokda da işimizi çətinə saldıq. Komanda ruhunu yaxşılaşdıra bilsək, yeni transferlər də uyğunlaşsalar, daha yaxşı "Neftçi" görəcəyik” - deyə o bildirib.

S. Abasov çempionluq şanslarının az olduğunu söyləyib: "Bugünkü durumda özünüzü yerimə qoyun, nəsə demək çətindir. Reallığı qəbul etsək, çətindir, bəlkə də mümkünsüzə yaxındır. “Neftçi”nin baş məşqçisi kimi bunu deməyimi düz anlamayacaqlar. Hər oyuna qalib ruhu ilə çıxacağıq".

O, yayda edilmiş transferlərin uğursuz olduğunu düşünmədiyini vurğulayıb: "1-2 transfer gəlir, alınmır. Bu gün “Neftçi”nin üzərində dayanırsız. Amma bu şeylər digər komandalarda olur. İstəyirsiniz, deyim adlarını. Uğursuz transferlər olduğunu düşünmürəm. Ən üzüldüyüm və heyfsləndiyim, Roman Baskın getməyi idi. Bizə indi hava-su kimi lazımdır. Həyat belə gətirdi. Biz göndərmədik, gedəsi oldu. Biz göndərdiyimiz Harramiz, Korreadır. Bundan sonra nə deyəcəyəm? Oynamalıyıq. Uğursuz olsaq, nə baş verəcək? Bu suallar rəhbərliyədir. Mən özümə vaxt istəmirəm. Reallıqları bilən adamam. Azərbaycanda heç bir baş məşqçi vaxtdan danışa bilməz. Hər bir klubda vəziyyət eynidir".

Abasov digər futbolçuların çıxışına da toxunub: "Bir futbolçu mənim komandamdadırsa, onun uğursuz transfer olduğunu deyə bilmərəm. Amma Xəyal Nəcəfov bu gün meydanda özünü yaxşı tərəfdən göstərdi. Yusuf Lavala diqqət daha da artıb. Əvvəllər daha çox boşluq əldə edirdisə, indi müəyyən çətinliklərlə üzləşir. Sürətinin aşağı düşdüyünü deməzdim. Əksinə, hücumda fəaldır. Ölkə xaricindən də ona diqqət böyükdür. Azərin medyana çıxması fiziki durumundan asılıdır. Müəyyən müddət var ki, o dövrü keçməlidir. Bundan sonra daha çox oynamaq şansı qazanacaq. Sezar Meza Kolli isə ilk dəqiqələrdən oynamağa hazır deyildi".