“Nəticənin belə olmağını istəmirdik. Rəqibi təbrik edirəm. Ən yaxşı penalti vuranımız da vurmaya bilərdi. Bu, üzərində durulacaq məqam deyil”.

Futbolmedia.az xəbər verir ki, bu sözləri “Neftçi”nin baş məşqçisi Samir Abasov Azərbaycan kubokunun yarımfinal mərhələsində “Zirə” ilə cavab matçından (0:0, penaltilər seriyası - 2:4) sonra təşkil olunan mətbuat konfransında deyib.

İlk oyunda da paytaxt təmsilçisi ilə 0:0 hesablı heç-heçəyə razılaşan komandanın çalışdırıcısı penaltilər seriyasında uduzaraq mübarizəni dayandırmaqlarını belə şərh edib: “Oyuna gəldikdə isə futbolçularımı soyunub-geyinmə otağında təbrik etdim. Həddən artıq istəkli idilər. Çoxdandır ki, belə oyun görmürdük. Məğlub olduğumuza görə heyfslənirik. Amma gələcəyə baxmalıyıq. İnanıram ki, daha da yaxşı olacağıq. Maraqlı bir məqam var. Pis oynadığımız oyunlar var ki, qələbə qazanmışıq. Bu gün isə əksi oldu. İkinci hissədə və əlavə vaxtda komanda çox istəkli idi, futbolçular qol vurmaq üçün alışıb-yanırdılar, hər şeyi yaxşı və düzgün edirdilər. Tiaqonun bir-iki epizodu oldu, onları vura bilsəydi, bu gün sevinən tərəf biz olardıq. Göstərdikləri oyuna, əzmə görə futbolçularımı təbrik edirəm. İstəməzdik ki, titulsuz qalaq. Həyatdır, davam edir, belə şeylər də olur”.

Abasov AFFA İcraiyyə Komitəsinin bu gün qəbul etdiyi qərarlar barədə də danışıb. O, həmişə çempionatımızda legioner limitinin aradan qaldırılmasının tərəfdarı olduğunu deyib: “İnanın ki, heç qərarlarla tam tanış olmamışam. Hər zaman limitin aradan qaldırılmasını istəyənlərdən biri mən idim. O vaxt da fikirləşirdim ki, bu, inkişafa mane olur. Həmin dövrdə jurnalistlər, mütəxəssislər mənim üzərimə hücum etdilər. Ondan sonra dedim ki, mən kənarda qalım. İndi isə niyə ləğv olunmur deyə sual verilir. Bununla bağlı cavab verən deyiləm. Danışdım və gördüm. Hamısı özünü yaxşı eləmək, patriotluğunu göstərmək istəyir. Qərar verdim ki, danışmaq olmaz və danışmayacağam”.