"Qış fasiləsindən sonra ilk rəsmi oyunumuz idi, buna görə də bizim üçün çətin oldu".

Futbolmedia.az xəbər verir ki, bu sözləri "Neftçi"nin yeni baş məşqçisi Samir Abasov evdə "Sabah"la 1:1 hesablı heç-heçə etdikləri Azərbaycan Kubokunun 1/4 final mərhələsinin ilk oyunundan sonra mətbuat konfransında deyib.

44 yaşlı mütəxəssis bildirib ki, "Sabah" yüksəlişdə olan komandadır: "Kubok görüşü olduğundan ikinci matçda da bu cür çətinliklər bizi gözləyəcək. Yolumuza davam etmək istəyirik".

Abasov komandadan ayrılan futbolçular haqqında da danışıb: "Harramiz Soares uğursuz transfer oldu. Onu komandada saxlamaq yersiz idi. Özü ilə də danışdıq. Bizi anlayışla qarşıladı. Amma Romen Baskı buraxmamalı idik. Ailəsinə görə komandadan ayrıldı. Dəfələrlə söhbətlərimiz oldu. Lakin ailəsi bura gəlmək istəmədi. Ona görə üzülürəm. Lakin Mamadu Kane və Sabir Buqrinin gedəcəyini gözləyirdik. Yeni komanda qururuq. Bir az vaxt lazımdır".

Baş məşqçi yeni transferlərin komandaya xeyir verəcəyini söyləyib: "Gilyerme Pato tanıdığımız oyunçudur. Azər Əliyevə gəlincə, Rusiyadan futbolçunu bura gətirmək asan deyil. Amma komandaya gec qoşulduqları üçün problem yaşadıq. Ona görə də futbolçuları dəyişə-dəyişə hazırlayacağıq. Ümid edirəm ki, tezliklə bunun öhdəsindən gələcəklər. Çünki hamısı yaxşı futbolçulardır.

"Problemləri görürük. Hücumçular əla vəziyyətdə deyil ki, çıxıb 90 dəqiqə oynasın".