“Bütün qalibləri təbrik edirəm. İdmançılarımıza qarşıdakı yarışlarda uğurlar arzulayıram”.

Futbolmedia.az xəbər verir ki, bu sözləri “Qarabağ”ın baş məşqçisi Qurban Qurbanov İdman Araşdırmalar Mərkəzi (İAM) tərəfindən təşkil edilən “İlin Qalibləri-2021” layihəsinin mükafatlandırma mərasimində deyib.

7-ci dəfə ilin ən yaxşı baş məşqçisi mükafatına layiq görülən mütəxəssis bununla bağlı qeyd edib: “Dəfələrlə demişəm ki, bizim üstünlüyümüz o olmalıdır ki, daha çox öz işimizlə məşğul olaq, futbolçularımızın idman formalarını yaxşılaşdıraq, xalqımıza xidmət edək. Buna görə komandam haqda çox fikir bildirmək istəməzdim. Hər birinizə təşəkkür edirəm ki, komandamı qalib seçdiniz. Hər dəfə çalışdıq ki, mübarizə aparaq. Amma həmişə narahat idik. Amma torpaqlarımız işğaldan azad olunduqdan sonra futbolçularımız meydanda daha ürəkli mübarizə apardılar”.

Qurban Qurbanov ilin futbolçusu seçilən "Neftçi"nin kapitanı Emin Mahmudova daha əvvəl təklif göndərdiklərini bildirib: "Kamran Quliyevin açıqlamasından sonra inanmıram ki, yenidən bunu edək. Çünki Emin “Neftçi” üçün dəyərlidir. Amma yalan danışmayacağam. Daha əvvəl onu komandada görmək istəmişik, lakin uğurlu alınmayıb".