Azərbaycan kubokunun 1/4 final mərhələsi çərçivəsində "Sabah" və "Qəbələ" klubları üz-üzə gəlib. Qarşılaşma qolsuz bərabərliklə yekunlaşıb.

Futbolmedia.az xəbər verir ki, "Sabah" klubunun baş məşqçisi Valdas Dambrauskas matçdan sonra oyun barədə fikirlərini bölüşüb.

Mütəxəssis komandasının performansından narazı qaldığını gizlətməyib. O, "Sabah"ın ortalamadan aşağı çıxış etdiyini, istədikləri pressinq və hücum planlarını reallaşdıra bilmədiklərini vurğulayıb. Dambrauskas rəqibi təbrik edərək, "Qəbələ"nin onları çox yaxşı analiz etdiyini bildirib.

Baş məşqçi noyabr ayından bəri davam edən qol seriyasının qırılmasını komandanın kuboka az köklənməsi ilə əlaqələndirməyib. O, həmçinin start heyəti ilə bağlı seçimlərindən danışıb:

"Bu gün meydana çıxdığımız start heyəti zəif adlandıra bilmərik. Stefan Ende ilk matçına çıxırdı. Ondan başqa bütün futbolçular daha öncə start heyətində yer alan oyunçular idi. Mənim bu komandada hər bir futbolçuya ehtiyacım var. İlk 11-likdə hər futbolçudan yararlanmaq istəyirəm. Bu gün bütün futbolçularım döyüşdü".

Dambrauskas kuboku çempionata qurban verəcəkləri barədə iddiaları qətiyyətlə rədd edib:

"Biz heç nəyi fəda etmək niyyətində deyilik. Hər bir qarşılaşmaya qələbə üçün çıxırıq. Mənim üçün növbəti matç prioritetdir. Bu gün komanda oyununda çox zəif çıxış etdik. Sadəcə bir şansımız oldu, ondan da istifadə edə bilmədik. Amma cavab matçı var və istədiyimiz nəticəni əldə etmək üçün əlimizdən gələni edəcəyik".