“Heç bir oyunçu topdan gizlənmədi. Bu cür oynayan "Sabah"ı həmişə görmək istəyirik”.

Futbolmedia.az xəbər verir ki, bu sözləri "Sabah"ın baş məşqçisi Valdas Dambrauskas Misli Premyer Liqasının 14-cü turunda “Neftçi” üzərində qazanılan 2:0 hesablı qələbəni şərh edərkən deyib.

Mütəxəssis futbolçularının möhtəşəm çıxış etdiyini, davranış və yanaşmalarının çox xoşuna gəldiyini vurğulayıb. O, qələbənin əsas açarının ilk dəqiqələrdən təşəbbüsü ələ almaq istəyi olduğunu bildirib. Dambrauskas "Neftçi"nin fərqli düzülüş və gözlənilməz heyətlə çıxmasına baxmayaraq xüsusilə ikinci hissədə rəqibə topla oynamaq imkanı vermədiklərini qeyd edib. O, komandasının qol fürsətlərini reallaşdıra bilməməsindən narahatlığını da gizlətməyib:

“Neftçi" fərqli düzülüşdə idi və start heyətində gözləmədiyimiz dəyişikliklər etmişdilər. İkinci hissədə daha yaxşı çıxış edən, topa nəzarəti ələ alan və rəqibə təzyiq göstərən tərəf biz idik. "Neftçi"yə topa çox sahib olmağa imkan vermirdik. Məni məşqçi kimi məyus və narahat edən isə qol epizodlarını dəyərləndirə bilməməyimizdir. Bəzən sonuncu ötürməni verə bilmədik. Çox qol fürsətini qaçırdıq. Daha çox inkişaf etməliyik. Həftəsonu bizi çox çətin səfər və çox çətin rəqib gözləyir. Daha sonra isə "Qarabağ"la önəmli oyuna çıxacağıq".

Baş məşqçi Aleksey İsayevin zədələnməsinə təkrarlanmasına da münasibət bildirib:

“Əvvəlki zədəsi ilə bağlı olduğunu düşünmürəm. Amma yenə də həkimlərlə danışmaq lazımdır. Hesab edirəm ki, Aleksey bizim üçün önəmli futbolçudur və inkişaf etməkdədir. Meydandakı keyfiyyəti ilə oyunumuza təsir göstərir. Ümid edirəm ki, zədəsi ciddi olmayacaq”.