Azərbaycan millisinin baş məşqçisi Fernandu Santoş DÇ-2026-nın seçmə mərhələsinin D qrupunda İslandiyaya qarşı keçiriləcək sabahkı oyun öncəsi mətbuat konfransında iştirak edib.

Futbolmedia.az xəbər verir ki, o deyib:

– Seçmə mərhələnin ilk oyunu bizi gözləyir. Hər matç çətin keçir. Sabah səfərdə oynayacağıq. İslandiya evdə uduzmamaq üçün əlindən gələni edəcək. Rəqibi yaxşı öyrənmişik, komandanın xüsusiyyətlərini bilirik. Onlar yaxşı təşkilatlanmış, topa nəzarət edən kollektivdir. Yeni baş məşqçiləri var. Mənim futbolçularım rəqib haqda hər şeyi bilir. Çətin görüş olacaq, amma biz bura qələbə üçün gəlmişik.

– Avro-2016-da Portuqaliya ilə İslandiyanı məğlub edə bilməmişdiniz (0:0). O oyunu necə xatırlayırsınız?

– O vaxt çox güclü komanda idilər. Sonadək təslim olmadılar. Bütün oyunçuları xaricdə, güclü klublarda çıxış edirdi. Təcrübəli futbolçuları çox idi. Sabah isə biz meydanda ən yaxşı oyunumuzu göstərməliyik.

– Havanın matça təsiri necə olacaq?

– Buna görə də öncədən gəldik ki, uyğunlaşaq. Uzun səfərdən sonra futbolçulara bir gün lazım idi ki, özlərinə gəlsinlər. Komanda bərpa olundu. İndiyə qədər vaxtımız var. Yağış hər iki tərəf üçün olacaq, amma ot örtüyünün vəziyyətini bilmirəm.

– Sabah millinin kapitanı kim olacaq?

– Emin Mahmudov.

– İlk iki oyunda sizi hansı nəticə qane edər?

– İki qələbə bizi qane edər. Hamımız qələbə qazanmaq istəyirik. Çox şey danışmaq olar, amma hər şey meydanda həll olunur. Əsas odur ki, futbolçularımız mental baxımdan hazırdır, motivasiyalı və diqqətlidirlər. Onlar qələbə qazanmaq və Azərbaycan xalqını sevindirmək istəyirlər.

– Sabah futbol dünyasını təəccübləndirə biləcəksiniz?

– Tarix yazmaq istəyirik. Futbolçular bunu bilirlər və buna görə çalışırlar. Sabah yaxşı mübarizə aparıb nəticə qazanmağa çalışacağıq.

– Siz möcüzəyə inanırsınız?

– Xeyr. Möcüzəni insanlar yaradır. Çətin qrupdayıq, amma məqsədimiz maksimum xal toplamaqdır. Bizim əsas vəzifəmiz budur.