"Bildiyiniz kimi, bəzi səbəblərə görə futbolçu karyeramı başa vurmaq məcburiyyətində qaldım. "Sumqayıt" klubda qalıb işləməyimi təklif etmişdi. Ayxan Abbasovdan da təklif gəldi. Bunu dəyərləndirdim. Ona və AFFA rəhbərliyinə təşəkkür edirəm".

Futbolmedia.az xəbər verir ki,Azərbaycan U-21 millisinin analitiki Vüqar Mustafayev sabah Belarusa qarşı keçirəcəkləri matçdan öncə danışarkən deyib.

O, əvvəlcə yığmaya təyinatından söz açıb: "Çox məsuliyyətli bir işdir. Millinin şərəfini futbolçu kimi qorumuşam. İndi isə məşqçi kimi çalışmaq qürurvericidir. İnanıram ki, əlimdən gələni edib, həm məşqçilərə, həm də futbolçulara kömək olacağam".

V.Mustafayev gələcək planlarından da danışıb: "Artıq ilk addımı atdım. İstəyirəm ki, məşqçi kimi fəaliyyət göstərim. İndi başlanğıcdayam. İnsan özünü analiz edir. Özünə sual edir ki, həqiqətən məndə o potensial varrmı, baş məşqçi ola biləcəyəmmi? Hədəfim, niyyətim budur. Alınsa, çalışacağam ki, ölkəmiz, xalqımız üçün ən yaxşısını edim. Alınmasa da, geri çəkiləcəyəm, özümü başqa bir sahədə sınayacağam".

O, artıq futbolçuları analiz etdiyini vurğulayıb: "Artıq futblçuları analiz etməyə başlamışam. Bir çoxu ilə komanda yoldaşı, bir çoxu ilə isə rəqib komandalarda qarşılaşmışam. Bəzilərini izləmək üçün son həftələrdə fürsətim olub. Yaxşı kollektiv var, mehribandırlar. İnanıram ki, qarşıdakı oyunlarda millinin yaxşı nəticələrini görəcəyik".

Qeyd edək ki, hazırda Belarusda təlim-məşq toplanışı keçən U-21 millimiz iyunun 4-də bu ölkənin müvafiq yaş qrupundan ibarət komandası ilə qarşılaşacaq. Görüş Bakı vaxtı ilə saat 20:00-da başlayacaq.