"Artıq əsas işimizi görə bildik. Qrupda oynayacağıq. Daha əvvək Avropa Liqasının qrupundan çıxmağa yaxın olmuşduq".

Futbolmedia.az xəbər verir ki, bu sözləri "Qarabağ"ın kapitanı Maksim Medvedev Avropa Liqasının qrup mərhələsinin ilk turunda sabah "Molde" ilə keçiriləcək oyun üçün təşkil edilən mətbuat konfransında deyib.

O qeyd edib ki, komanda çox həvəslidir və bu mövsüm daha yaxşı uğurlara imza ata bilərlər: "Bu il də yaxşı imkanımız var. İstifadə edə bilərik. Futbolçular hər şeyi edəcəklər ki, daha da irəliləyək. Hazırda oyunçularda elə atmosfer yaranıb ki, hamı oynamaq istəyir, heyət genişlənib. Məşqdən də görünür ki, hamı oynamaq istəyir. İnanıram ki, belə həvəslə bu il daha böyük uğurlar əldə edə bilərik".

M.Medvedev son vaxtlar meydana az çıxması ilə bağlı da danışıb: "Ola bilsin ki, az oynayıram. Amma daim komanda ilə birlikdəyəm. Çalışıram ki, özümü yaxşı formada saxlayım. Oyunda ala bilmədiklərimi çalışıram ki, məşqdə alım. Uzun müddət böyük oyunlar oynamasam da, təcrübəm var, beynimdə hər şey qalıb. Uşaqlara baxanda da analiz edirəm. Daim özümü oyundakı kimi saxlayıram. Fiziki durumumu isə məşqdə düzəldirəm".