“Kəpəz” dünən Azərbaycan Premyer Liqasının 34-cü turunda “Sumqayıt”ı 1:0 hesabı ilə məğlub edib.

Tovuz şəhər stadionunda keçirilən matçdan sonra bölgə təmsilçisinin portuqaliyalı qapıçısı və oyunun ən yaxşılarından olan Rojerio Santos Futbolmedia.az saytına müsahibə verib. Həmin müsahibəni təqdim edirik:

– Əvvəlcə oyun haqda fikirlərini bölüşrdin…

– Oyun haqda onu deyə bilərəm ki, ilk hissəni çox yaxşı oynadıq və 1:0 önə keçdik. Bu da ikinci hissədə öz effektini göstərdi. “Sumqayıt”a qarşı yaxşı müdafiə olunduq. Ümumi götürəndə, “Kəpəz”in ən yaxşı oyunlarından biri demək olardı.

– Bir gün əvvəl keçirilən “Səbail”in səfərdə “Zirə” ilə matçını izləmisiz?

– Xeyr. Ötən gün oyuna baxmamışıq. Birincisi, bu gün (dünən) öz oyunumuz var idi, buna fokuslanmaq lazım idi. İkincisi də, biz işimizi kiminsə şansına buarxmağı deyil, öz oyunumuzu fikirləşirdik və bilirdik ku, burdan yaxşı nəticə ilə ayrılacağıq.

– “Səbail”in məğlubiyyətinin komandanızın “Sumqayıt”la matçdakı performansına hansısa təsiri oldu?

– Mənə görə heç bir fərqi yoxdur, bu barədə fikirləşmirdim. Sadəcə, bu oyuna köklənmişdik. İstədiyimizi əldə etdik, hesabımıza daha bir qələbə yazdırdıq.

– Premyer Liqadakı yerinizi qorumağınızı bu oyunda – doğma publika önündə təmin etmiş olsaydız, sevinc daha çox olardı?

– Biz onsuz da sevinciliyik, xoşbəxtik. Çünki ilk 8 oyunda “Kəpəz” məğlub olmuşdu. Heç kim inanmırdı ki, Premyer Liqada qala bilək. Hamı deyirdi “Kəpəz” aşağıya doğru yuvarlanır. Biz artıq sübut etdik ki, güclü komandayıq.

– Mövsüm sona yaxınlaşır. Həm “Kəpəz”in performansını, həm də özünün Azərbaycandakı karyeranı necə dəyərləndirirsən?

– İlk öncə öz işimi görmüşəm, komandaya xeyrim dəyibsə, nə yaxşı. Bu il qələbələrimiz daha çox top-komandalarla oyunlarda oldu. Bundan sonra da iki oyunumuz var və bu matçlarda da özümüzü qələbə ilə sevindirə bilərik.

– Gələcəyinlə bağlı qərar vermisən? Müqavilən yayda bitir…

– Xeyr. Hələ ki, heç bir danışıq yoxdur.

– Yeni müqavilə ilə bağlı təklif “Kəpəz”dən gəlsə, ilk seçimin burada qalmaq olacaq, yoxsa digərlərini dəyərləndirəcəksən?

– Hazırda heç bir danışıq yoxdu. Olarsa, dəyərləndirib özüm üçün ən yaxşı qərarı verəcəm.

– Oyunda münaqişə yaşandı. Buna münasibətin necədir?

– Bu, futboldur. Burada hər şey ola bilər. Bu da həmin hallardan biri idi.

– Yaxşı qurtarışların oldu. Səni oyunun qəhrəmanı saya bilərik?

– Biz burada individuallardan danışa bilmərik. Udanda da, uduzanda da bunu komanda şəklində edirik. Bir uğur varsa, bu, komandanın uğurudur. Şəxsi heç bir şey yoxdur.