“Qarabağ”ın baş məşqçisi Qurban Qurbanov “Sumqayıt”la bugünkü matçdan sonra təşkil edilən mətbuat konfransına futbolçularını təbrik etməklə başlayıb.

Futbolmedia.az xəbər verir ki, Misli Premyer Liqasının 33-cü turunda Ağdam təmsilçisi “Sumqayıt”a 2:0 hesabı ilə qalib gəlib.

Q.Qurbanov rəqibləri barədə müsbət fikirlər səsləndirib, onların istəkli olduğunu, sona qədər döyüşdüyünü deyib: “Az sayda qol epizodları yaratdılar. Yaxşı mübarizə oldu. Bu hallar sevindiricidir. Meydanda 90 dəqiqə mübarizə gördük”.

“Qarabağ”ın heyətində bugünkü matçda 15 yaşlı müdafiəçu Amin Rzayev rəsmi debüt edib. Bu fakta münasibət bildirən Qurbanov deyib:

"O, xeyli müddətdir məşqlərdə bizimlə olur. Hələ gəncdir, perspektivi var. Hələ maksimum yükləmələri qəbul edə bilmir. Gələcəkdə özündən daha çox şey asılı olacaq. Perspektivi var deyə əsas komandaya cəlb etmişik. Yaşı az olsa da, fiziki göstəriciləri pis deyil. Formalaşması üçün ona vaxt lazımdır. Bir neçə mövqedə oynamağı bacarır. Belə oyunçuların olması bizim üçün vacibdir. Biz perspektivli hər futbolçu üçün şərait yarada bilərik. Digər məsələlər onların özlərindən asılıdır. Sevimli mövqeyi sol cinah müdafiəçisidir. Qarşıdakı oyunlarda imkan olduqca oynamaslna şərait yaradacağıq. Bütün gənclər üçün qapımız açıqdır”.

Ötən oyun paltardəyişmə otağında futbolçusu Bəhlul Mustafazadə ilə salamlaşmaması barədə suala baş məşqç belə cavab verib: “Əgər problemli bir şey yoxdursa, açıqlama vermək artıq olar. Bəhlulla uzun müddətdir bərabərik. Demək olar 95 faiz oyunlarda çıxış edir. Görünən odur ki, problem yoxdur".

Qurban Qurbanov "Traktor" klubunun tarixində ilk dəfə İran çempionu olmasını da şərh edib, bu komandayla yoşdaşlıq oyunu keçirə bilmələrinin mümkünlüyünə toxunub:

“Traktor”u çempionluq münasibəti ilə təbrik edirəm. Bu komanda ilə yoldaşlıq oyunu keçirməyə şad olardım. Hər iki klub rəhbərliyi danışıb, ortaq məxrəcə gəlsələr, oyunu keçirə bilərik”.