"Neftçi"nin baş məşqçisi Samir Abasov Misli Premyer Liqasının 32-ci turunda "Sumqayıt"la 2:2 hesablı heç-heçə etdikləri oyunu şərh edib.

Futbolmedia.az xəbər verir ki, o, matçdan sonra keçirilən mətbuat konfransında deyib:

– İki fərqli hissənin səbəbi nə idi?

– Düşünmürəm ki, iki fərqli hissə idi. Birinci dəqiqələrdən oyuna diktə etməyə çalışırdıq. Kontrol etmək və rəqibi təzyiq altında saxlamağı planlaşdırırdıq. Bir neçə dəfə oldu ki, təzyiq edib topu aldıq və son qərarı düzgün vermək lazım idi. Həmin epizodlarda qol vura bilərdik, amma öz qapımızda gördük. Eyni şeylər təkrarlanır. Xoşlamadığım məsələyə gəlmək istəyirəm. "Neftçi" olaraq uduzduqda və ya heç-heçə etdikdə nəticəyə köklənirik. Ona görə bu mövzu üzərində durmuruq. Amma düşünürəm ki, bu gün hakimlik problemə çevrilmişdi. Başa düşürəm ki, son vaxtlar üzərimizdə təzyiq çoxdur. Bizim ətrafımızda biraz neqativ yaranıbsa, bu səbəb deyil ki, kimlərsə istədiklərini etsinlər. Qərarlar haqda deməzdim, amma sanki oyun təmiz itmişdi. Nə qədər 4-cü hakimlə danışdıq ki, biz sakit durmuşuq, istəmirik bizi başqa cür qələmə versinlər, ona görə siz deyin. Qol epizoduna gəldikdə, ola bilər, VAR otağında başqa kadrlar olsun. Amma biz baxdığımız videolara əsasən, təmiz qol idi. Həmin dəqiqə 2:2 etsəydik, demək ki, qalib ola bilərdik. Təmiz qolumuzu saymadılar. Yenə də deyirəm, əgər Ağadadaşın ayağına dəyibsə, amma biz görməmişik, üzrlü sayın. Amma gördüyümüzə əsasən, oyundan kənar vəziyyət yox idi. Futbolçular sağ olsunlar. Geridə olsaq da, qollar vurduq. Baxmayaraq ki, son vaxtlar "Neftçi"də olan hər kəsin üzərində təzyiq var. Bunun altından çıxaraq oynadılarsa, sağ olsunlar.

– Bəzi futbolçular özlərini göstərməyə çalışır, bəziləri isə sanki artıq təslim olublar və "Neftçi"dən gedəcəklərini qəbul ediblər. Siz necə düşünürsünüz?

– Peşəkarlıqdan danışırıqsa, heç kimin təslim olmağa ixtiyarı yoxdur. Çünki aqibətimizi bilmək olmur. Burdan çıxırsansa belə, dünyada çoxlu klublar var, ən azından burada ona görə oynamalısan ki, digərlərinin rəğbətini qazanasan. Təslim olmağa heç kəsin ixtiyarı yoxdur. Amma kökləmək çətindir. Danışıqlarla meydanda olanlar üst-üstə gəlmədi. İndi oyuna kökləmək mənim üçün də çətindir. Bundan da bir dərs çıxarmalıyıq. Biz öz problemlərimizi bilirik. Bu gün oturmuş komandaya qarşı oynadıq. "Neftçi" üçün bu cür oynamaq yolverilməzdir. Çünki bura gələn oyunçular ən azından maliyyə cəhətdən fərqlənir. Amma rəqibin müdafiəsini yarmaq niyə problemli gəlir, onu bilirik. Elə problem var dərhal düzəltmək olur, amma bəziləri üçün müddət lazımdır. İnşallah, çalışacağıq daha yaxşı komanda olaq.

– Növbəti mövsüm üçün beyninizdə hansı planlar var?

– Baxmayaraq ki, hər həftə rəqiblərlə oynayırıq, bütün günü gələcək üçün qurduğumuz planlar üzərində işləyirik. Bu, sirr deyil. Oyunçuların və məşqçi heyətinin axtarışı, kollektivdə nəyi inkişaf etməli olduğumuz şeylərlə bağlıdır.

– Yarımmüdafiədə olan itkilər oyuna nə qədər təsir etdi?

– Zədələr bu günün problemi deyil. Hansı oyuna bir heyətlə çıxmışıq? Ola bilər ki, zədəyə görə Emin Mahmudov mövsümün erkən bitirdi. Uzun müddət oynamadı, sonra isə çox güc sərf etdi. Ondan əlavə Ohori, Quzzo, Səfərov da zədələndi. Baxanda, 6-7 nəfər var, amma həm heyət quranda, həm əvəzetmələrdə bu problemlə üzləşirik. Bu mövsüm bura gələndə ilk keçdiyim məşqdən sonra iki nəfər xaricə müalicə getdi. Həmin məşqdə Azər Salahlının da ayağı qırıldı. Bu problem daima davam edir. İnşallah, dediyimiz planları indidən qurmalıyıq ki, bu cür problemlər olmasın.

– Bəziləri deyirlər ki, Samir Abasov bilirdi, hara gəlir. "Neftçi"ni çempion etmiş məşqçi kimi, bura gələndə bu cür nəticələri gözləyirdiniz?

– Gözləyirdim. Düz deyirlər ki, bilirdik, hara gəlirik. Demirəm ki, bilmirdik. Nəyin bizi gözlədiyini və nə etməli olduğumuzu da bilirdik. Amma ondan da ya