“Oyun haqqında danışılası çox söz yoxdur. “Qarabağ”ı təbrik edirəm. Avroliqa oyunlarında komandaya uğurlar arzulayıram”.

Futbolmedia.az xəbər verir ki, bu sözləri “Sumqayıt”ın məşqçisi Seymur Rəhimov Misli Premyer Liqasının 8-ci turunda səfərdə “Qarabağ”a uduzduqları oyundan sonra deyib.

O, 0:5 hesablı məğlubiyyəti belə şərh edib: “Rəqibin gücünü bilirdik. “Qarabağ” Avropada adından söz etdirən komandadır. Uşaqlar bu gün əllərindən gələni etdilər. Lakin səviyyə fərqi özünü göstərdi”.

Mütəxəssis komandasının səhvlərini də qeyd edib: “Təbii ki, bu cür uduzacağımızı gözləmirdik. Səhvlərimiz oldu. Onların üzərində işləyəcəyik. “Qarabağ”a qarşı hansı heyətlə oynayırsan, oyna, yenə də çətin olacaq”.

S.Rəhimov qapıda dəyişiklik etməmələri barədə sualı belə cavablandırıb: “Vaxtı çatanda Orxan Sadıqlı da şans qazanacaq”.

“Sumqayıt”ın məşqçisi gələcəyi nikbin baxdıqlarını vurğulayıb: “Bu oyunu yaddan çıxarıb, növbəti matçlara hazrlaşmalıyıq. Bu gün ikinci hissədə bəzi hücumlarımız oldu. Az da olsa bu məqam gələcək oyunlara nikbin baxmağa əsas verir”.