"Futbolçularımı təbrik edirəm. Xeyli əziyyət çəkdilər, yoruldular. Yaxşı, intizamlı müdafiə olunan komandaya qarşı oynadıq. Şükürlər olsun ki, sonda 3 xalı qazandıq".

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov Misli Premyer Liqasının 10-cu turunda bu gün "Sumqayıt"a qalib gəldikləri oyundan sonra mətbuat konfransında deyib.

O, 3:1 hesablı qələbəni belə şərh edib: "Futbolçularımdan razı qaldım. Rəqibin əks-hücumlarının qarşısını ala bilirdik. İkinci hissədə bir anlaşılmazlıq oldu, qol buraxdıq. Samir Abasova uğurlar arzulayıram. İnanıram ki, qarşıda daha yaxşı, nəticə verən komanda olacaq. Azarkeşlərimizə təşəkkür edirəm. Elə zamandayıq ki, futbolçuların yorğunluqdan sonra dərhal özlərinə gələcəklərini deyə bilmərik. 4 gün sonra yenə oyunumuz var. Futbolçularımızın yaxşı durumunu geri qaytarmağa çalışacağıq. ". Asan deyil".

Q.Qurbanov Kevin Medinanın müdafiənin sol cinahında oynamasını belə izah edib: "Daha əvvəl də “Sumqayıt”a qarşı bu mövqedə oynamışdı. Variantlardan biridir. Bu gün Rahil, Maksim və Medinanın meydanda olmasını istəyirdim. Oyun praktikaları üçün vacib idi. Qarşıda yenə belə addım ata bilərik".

Baş məşqçi klublarımızda yerli mütəxəsisslərin çalışmasını müsbət hal kimi qiymətləndirib: "Mənim üçün xoşdur. Azərbaycanlı kadrlarımızın hərəsinin bir komandanın başında olmasına ancaq sevinə bilərik. Bölgələrə getmək çox maraqlıdır. Tovuzda ilk çempionluğumu yaşamışam. Gəncədə azarkeş kütləsi, ajiotaj çox yaxşıdır. Oraların futbol mədəniyyətini yenidən yada salmaq çox xoşdur".

Q.Qurbanov zədəli futbolçusu Kadinin Avropa Liqasının qrup mərhələsində “Nant”la oyuna hazır olub-olmayacağının hələlk bilinmədiyini də qeyd edib: "Vəziyyəti yaxşılığa doğru gedir. Qarşıdakı matçda oynayıb-oynamayacağını hələ bilmirik. Gələn həftə daha dolğun cavab verə biləcəyik".

Q.Qurbanov rəqibin yaxşı müdafiə olduğunu da əlavə edib: "Dəyişikliklər çox olmuşdu. Belə müdafiə olunan komandalara qarşı ilk dəqiqələrdən nəsə etmək çətindir. Birinci hissədə hücum xəttində çoxlu dəyişikliklər var idi. İkinci yarıda sürəti artırmaq, daha çox topa sahib olmaq lazım idi. Daha təcrübəli futbolçulardan istifadə edə bildik. Bu, o demək deyil ki, onlar ilk yarıda meydanda olsaydılar, qol vurardıq. Birinci hissədə komandalar daha canlı olurlar".