"Bizim üçün çox çətin oyun idi. Çünki hərtərəfli təzyiq vardı. Elitada qalmaq uğrunda mübarizə aparırıq. Sonuncu ev oyunundan sonra istefa şüarları da səslənmişdi".

Futbolmedia.az xəbər verir ki, bu sözləri "Kəpəz"in baş məşqçisi Azər Məmmədov Mİsli Premyer Liqasının 7-ci turunda bu gün səfərdə "Sabah"la keçirilən oyundan sonra mətbuat konfransında deyib.

O, 2:2 hesabı ilə başa çatan matçı belə şərş edib: "Sabah" sürətli komandadır. Hücuma həddindən artıq tez çıxırlar. Rəqibin qarşısını almaq üçün bunu təhlil etmişdik. Bu bir xal bizim üçün önəmli xaldır. Xallarımızın üzərinə daha birini gətirdi. Premyer Liqada qalmaq üçün daha bir xal qazandıq. Gəncədən gələn azarkeşlərimizə dəstəyə görə təşəkkür edirəm. Bu xalı istər yaxşı, istərsə də pis günündə "Kəpəz"in həmişə yanında olan azarkeşlərə hədiyyə etmək istəyirik".

Baş məşqçi qeyd edib ki, bu oyundan sonra yaxşı çıxış edəcəklərinə inanır: "Bu oyun düşünürəm ki, bizim üçün çempionatda dönüş olacaq. Evdəki ardıcıl məğlubiyyət seriyasına son qoyacağıq. Son günlərdəki hadisələrdə şəhid olan qardaşlarımızı da anmaq istəyirəm. Allah onlara rəhmət eləsin, qazilərə cansağlığı versin. Ordumuzun sayəsində vətənimizin başı həmişə ucadır. Allah ordumuzu, Azərbaycanımızı qorusun".

Azər Məmmədov azarkeşlərin "istefa" şüarı ilə bağlı da danışıb: "İstefa" şüarı bir az mənfi obraz yaradır. Amma bu kəlmənin çox böyük dəyəri var. Bəzən biz sözün dəyərini ucuzlaşdırırıq. Lazımlı və lazımsız yerlərdə "istefa" şüarı işlədilir. 6 turdan sonra yeni qurulan komandanın baş məşqçisinin istefası tələb olunursa, mən deməyə söz tapmıram. Hər "istefa" sularından sonra kimsə istefa verəcəksə, bu, o insanın zəifliyidir. Mən zəif adam deyiləm. İnanmıram ki, yaxşı işlər görəcəyik. Gəncədə işləmək çətindir. Amma hər şeyə rəğmən"Kəpəz"in baş məşqçisi olmaq çox qürurvericidir. Ağır hər olduğunu bura gələndə bilirdim. Mən qorxaq adam deyiləm, bacardığımı etməyə çalışacağam".