"Havanın isti olması çox çətinlik yaratdı. Bilirdik ki, rəqib ilk dəqiqədən təzyiq edəcək. Futbolçularım soyuqqanlılığını qorudu. Vacib qələbə qazandıq. Gəncədə "Kəpəz"i məğlub etmək çox çətindir".

Futbolmedia.az xəbər verir ki, bu sözləri "Turan Tovuz"un baş məşqçisi Ayxan Abbasov Misli Premyer Liqasının 3-cü turunun "Kəpəz"lə görüşündən sonra keçirilən mətbuat konfansında deyib.

O, görüşdə zədələnərək erkən əvəzlənən Sərtan Taşkının durumu ilə bağlı danışıb: "Rəqib futbolçu ilə toqquşdu. Baldır nahiyyəsindən zədələnib. Ümid edirəm ki, növbəti matça qədər hazır olacaq".

A.Abbasov Tovuz şəhər stadionunda görülən işlərin yekunlaşdığını, növbəti ev oyununu orada keçirəcəklərini bildirib..

Baş məşqçi üç səfər oyunundan altı xal qazanmalarını qənaətbəxş sayır: "Əlbəttə, xal baxımından əladır. Nəzərə alaq ki, bir oyunda "Qarabağ"a uduzmuşuq. Digər görüşlərdə qalib gəlmşik. Bunu qoruyub-saxlamaq lazımdır. Çempionatımız çox çətindir. Komandalar bir-birinə yaxındır, hamı digərini məğlub edə bilər".

A.Abbasov bir transfer etmək istədiklərini qeyd edib: "Diqqətimizdə olan, danışıq apardığımız futbolçular var. Transfer istəyirik. Ən azı orta xətdə bir futboçlçuya ehtiyac var".

O, bu mövsümün hədəfləri ilə bağlı suala isə belə cavab verib: "Orta pillələrdə olmalıyıq(gülür). Bu gün Premyer Liqa Tovuza ab-hava gətirib. Böyümək üçün liqada qalmalıyıq. Yolumuz çətindir. Tək əsas komanda yox, akademiya, infrastrukturla bağlı işlər gedir. Buna görə də Premyer Liqada möhkəmlənmək lazımdır. Birinci liqaya düşsək, işlərimiz yarımçıq qalacaq".