“Oyunun ağır keçəcəyini öncədən də bilirdik. “Neftçi” yaxşı komandadır. Heyətində güclü futbolçular var”.

Futbolmedia.az xəbər verir ki, bunu “Qəbələ”nin baş məşqçisi Elmar Baxşıyev Misli Premyer Liqanın 30-cu turunda “Neftçi”yə qarşı keçirilən oyundan sonra deyib.

Mütəxəssis komandasının 2:1 hesablı qələbəsini belə şərh edib: “Dinamik bir matça şahidlik elədik. Hər iki komanda açıq futbol sərgiləməyə çalışdı. Düşünürəm ki, futbolçular meydanda istədiklərimi komanda şəklində verməyə çalışırdılar. Qalib gəldiyimiz üçün sevinirik. Yolumuza davam edirik”.

E.Baxşıyev vurğulayıb ki, çempionatda hansısa komandanı zəif adlandırmaq olmaz: “Ümumi götürəndə çempionatda zəif, güclü rəqib anlayışı yoxdur. 3 xal qazanmaq üçün hər oyuna maksimum köklənmək lazımdır. Futbolçular da bunu başa düşürlər. Bu oyundan sonra ən önəmlisi bərpa prosesini keçib, kubok matçına ciddi hazırlaşmaqdır”.

“Qəbələ”nin çalışdırıcısı hazırda yalnız növbəti görüşü düşündüklərini bildirib: “Məndən də soruşsanız, futbolçulardan da soruşsanız, eyni cavabı alacaqsız. Mövsümün sonunda hansısa qarşılaşmanı yox, ancaq növbəti görüşü düşünürük. Bayaq da dediyim kimi, sabahdan etibarən bütün diqqətimiz kuboka yönələcək. “Səbail”lə matçdan yaxşı nəticə ilə ayrılmaq istəyirik".