"Oyuna çox pis başladıq. Əsasən də ikili mübarizələri uduzurduq. Birinci hissədə müdafiə xəttində inamsız çıxış etdik. İkinci yarıda nə qədər çalışsaq da, oyunun axarını dəyişə bilmədik".

Futbolmedia.az xəbər verir ki, bu sözləri "Sabah"ın baş məşqçisi Murad Musayev Misli Premyer Liqasının 23-cü turunda bu gün "Turan Tovuz"a uduzduqları oyundan (0:2) sonra mətbuat konfransında deyib.

"Sabah"ın qapısına penalti təyin edilərkən hakimin üzərinə gedən və iki sarı vərəqə ilə texniki zonadan qovulan rusiyalı mütəxəssis epizodu belə şərh edib: "Hakimdən soruşmaq lazımdır ki, nəyə görə qırmızı vərəqə göstərdi. Futbol emosional oyundur. Məni nəyə görə kənarlaşdırdığını deyə bilmərəm. Hakim bir istiqamət götürməlidir. Ya sərt oynamağa imkan verməlidir, ya da əksinə. Hakim bu gün çox ədalətsiz qərarlar verirdi. Amin Seydiyevə qarşı qayda pozuntusu var idi, amma onu vermədi, penalti təyin etdi. Buna görə emosional oldum və qırmızı vərəqə gördüm. Bizim əvvəlki matçımızda da hakimlər çox kobud səhvlər ediblər. Neçə dəfə yanlış qərarlar verərək bizim sürətli hücumlarımızın qarşısını alıblar. Sizə bizim oyunlarda olan 10 dənə kobud hakim səhvini göstərə bilərəm. Məğlubiyyətin günahkarı özümüzük. İstədiyimiz şeyləri həyata keçirə bilmədik. Amma hakimliyin səviyyəsi çox bərbad idi".

Musayev müdafiədə kobud səhv etdiklərini bildirib: "İkinci hissədə çoxlu qol vəziyyətlərimiz oldu. Amma bunları həyata keçirə bilmədik. Rəqib də əks-hücumlarda çox təhlükəli idi. Müdafiəmizin kobud səhvindən istifadə edərək ikinci qolu vurdular"