"Böyük üstünlüyə sahib idik. "Neftçi" komanda şəklində öz cərimə meydançasında müdafiə olunurdu. Avtoqoldan sonra demək olar ki, 90 dəqiqə müdafiədə oturdular. Bu gün meydanda gördüklərimiz çox qəribə idi. Öz futbolçularıma təşəkkür etmək istəyirəm. Əllərindən gələn hər şey etdilər. Bizim təmiz qolumuzu əlimizdən aldılar. Düşünürəm ki, orada heç bir qayda pozuntusu yox idi".

Futbolmedia.az xəbər verir ki, bu sözləri "Sabah"ın baş məşqçisi Murad Musayev Azərbaycan Premyer Liqasının 23-cü turunda "Neftçi"yə 0:1 hesabı ilə uduzduqları oyundan sonra keçirilən mətbuat konfransında deyib.

"Oyun ərzində çoxlu dəyişiklik edildi. Bir neçə dəfə həkimlər meydana daxil oldu, amma əsas vaxta cəmi 3 dəqiqə əlavə olundu. Bu hakim mənim "Sabah"a gəldiyim ilk oyunu idarə edirdi. Hesab 3:1 olarkən heç nədən 46-cı dəqiqədə Kamaranı qırmızı vərəqə ilə meydandan kənarlaşdırmışdı, lehimizə təmiz penaltini verməmişdi. Oyunu öz istədiyi kimi idarə edir" - deyə o bildirib.

M.Musayev "Sabah" ilk hissədə zəif təsir bağışlaması ilə bağlı söyləyib: "Mən bu fikirlə razı deyiləm. Rəqibin ilk hissədə qoldan başqa epizodu var idi? İlk hissədə zəif oynadığımızı düşünmürəm".

Mütəxəssis komandasının avrokuboklara vəsiqə qazanmaq şansını belə dəyərləndirib: "Avrokuboklarda iştirak etmək istəyirik. Əgər bugünkü kimi oyunlar olsa, biz avrokuboklara vəsiqə qazana bilməyəcəyik. Əlimizdən gələni edəcəyik. Amma hər şey may ayının sonunda bilinəcək".