"Vacib olan üç xal idi ki, onu da qazandıq. Birinci hissədə pis oynamadıq. Əks-hücumlara imkan vermədik. İkinci yarıda bunu qola çevirməliydik. Çünki rəqib böyük üstünlüklə hücuma atılmışdı. Keyfiyyət məsələsi ikinci yarıda özünü göstərdi. Futbolçularımı təbrik edirəm".

Futbolmedia.az xəbər verir ki, bu sözləri "Sumqayıt"ın baş məşqçisi Samir Abasov Misli Premyer Liqanın 22-ci turunda "Şamaxı"ya qalib gəldikləri oyundan (1:0) sonra mətbuat konfrnasında deyib.

O, yeni transfer Kamran Əliyevin debütü barədə bildirib: "Özünü debüt münasibəti ilə təbrik etdim. Amma açıq deyim ki, Dieqo Karioka zədələnməsəydi, Kamran bu gün oynamayacaqdı. Fiziki durumu imkan vermir ki, oynasın. Bəlkə də, Dieqonun zədələnməsi Kamranın fiziki durumunu bərpa etməsini sürətləndirər. Oynadıqca artıracaq. Yaxşı və pis oynasaydı da, birinci matçıdır, başa düşmək olardı. Kamrana uğurlar arzulayıram. Allah qoysa, daha çox xeyrini görərik".

Samir Abasov "Sumqayıt" futbolçuları tez bir zamanda cərimə meydançasına daxil olur. Bunu qış fasiləsində düzəltdiniz" sualını belə cavablandırıb: "Mən gələnə qədər heç qol da vurmamışdıq. Bunun səbəbi cərimə meydançasına qədər gedib çıxmamağımız, hücum qurmamağımız idi. Burada böyük problemlərimiz var idi. Gecəmiz-gündümüz məşqlərdədir. Fikrimiz cərimə meydançasına daxil ola bilməkdir. Sonluğu gətirmək futbolçulardan asılıdır. Bu gün də ikinci yarıda əziyyət çəkdik. “Neftçi” ilə oyunda 6-7 nəfərlə cərimə meydançasına daxil olurduq, amma son ötürmə, son vuruşlarda axsayırıq. Düzəldəcəyik. Düzəlməsə, bunları edən oyunçular bizə mütləq lazımdır. Bununla nəticə qazanmaq istəyirik".

Baş məşqçi yeni transferlərdən razı qaldığını deyib: "Ən azından transferləri özüm etmişəm, narazı ola bilmərəm(gülür). Sonra bunun arxasında dayanmaq var. Hamısından razıyam".