“Mənim və oyunçular üçün bu, çox böyük məyusluqdur. Komanda inamlı və şən idi, amma uğursuz olduq. Futbolçular çox çalışdılar. İlk hissədə Mərakeş müdafiəsini keçmək üçün kreativliyimiz çatışmadı".

Futbolmedia.az xəbər verir ki, bu sözləri Portuqaliya millisinin baş məşqçisi Fernandu Santuş DÇ-2022-nin 1/4 finalında Mərakeşə 0:1 hesabı ilə uduzduqları oyundan sonra deyib.

"Yekunda qol buraxdıq. Fasilədə bu haqda danışdıq, Mərakeş yaxşı müdafiə olunduğu üçün ayağa qalxmalı olduq. Oyunumuzuz xeyli yaxşılaşdı, xüsusilə son 20 dəqiqədə çox narahat idik. Topu tez bir zamanda cərimə meydançasına daxil etmək istəyirdik. Biz çox məyusuq" - deyə o bildirib.

Santuş söyləyib ki, mundialın qalibi olacaqlarına ümid edirdilər: "Bu nəsil bununla bitmir. Onların Portuqaliya futbolu üçün yaxşı işlər görmək imkanı olacaq. Çox səy göstərildi. Finala yüksələcəyimizə və qalib gələcəyimizə ümid edirdik".

Mütəxəssis komandanın kapitanı Kriştiano Ronaldonun start heyətdə olmaması ilə bağlı vurğulayıb: "Oyuna Ronaldo ilə başlamadığım üçün peşman deyiləm. Komanda İsveçrə ilə görüşdə yaxşı oyun nümayiş etdirdi. Kriştiano böyük oyunçudur və ehtiyacımız olduğu zaman onu meydana buraxdıq".

O, gələcəyi ilə bağlı bunları söyləyib: "Sabah Portuqaliya Futbol Federasiyasının prezidenti ilə milli komandadakı gələcəyim haqda danışacağam. Lissabona gedəcəyəm və prezidentlə görüşəcəyəm. Portuqaliya üçün nəyin yaxşı olduğuna qərar verəcəyik".