"Belə bir əlamətdar gün "Turan Tovuz" klubu, ümumiyyətlə Azərbaycan futbolu üçün çox əlamətdar hadisədir. Demək ki, ölkəmizdə futbol inkişaf edir. Demək, ölkəmizdə idman inkişaf edir. Əvvəllər şirkətləri cəlb etməkdə çox çətinlik çəkirdik. İndi futbolumuzla paralel maliyyə dəstəklərimiz də şaxələnib".

Futbolmedia.az xəbər verir ki, bu sözləri "Turan Tovuz" klubunun İdarə Heyətinin sədri Ehtiram Quliyev deyib.

O, jurnalistlərə müsahibəsində əvvəlcə klubun yeni əməkdaşlıq müqaviləsindən danışıb: "Biz xüsusən sponsorluq məbləğinin gizli qalmamasını istədik. Bu, digər şirkətlərə də stimul olacaq. Digər klublara da ruh verəcək. Onlar da sponsor cəlb edə biləcəklərini görəcəklər. Məncə, əlamətdar gündür və belə bir gündə bizimlə birlikdə olduğunuza görə hər birinizə təşəkkür edirəm".

– Niyə "Turan Tovuz" bu yay cəmi iki yeni futbolçu transfer etdi?

– Bizim planlarımız var idi. Danışdığımız çox vacib oyunçular oldu. Məlum hadisə ilə əlaqədar planlarda bəzi dəyişikliklər etməli olduq. Uzun müddət apardığımız danışıqlar... Bilirsiniz də, avrokuboklarda iştirak etmək oyunçular üçün əlavə stimul idi. Bizdə alınmadı, ona görə planlarımızda dəyişiklik oldu. Minimum daha iki transfer nəzərdə tuturuq və heyətimizi gücləndirməyə davam edəcəyik.

– "Məlum hadisə" dediniz. Mümkünsə, o barədə bir az geniş danışaq.

– Bu gün keçmiş haqqında danışmayaq. Gəlin gələcəkdən danışaq. Biz bu gün keçmiş haqqında düşünmürük, xoş şeylər haqqında danışmağı planlaşdırırıq. Çünki keçmişə baxsaq, orada çox ilişib qalacağıq. Ancaq qabağa, ancaq irəli. Bu tədbirin bir mahiyyəti də ondan ibarətdir ki, biz həvəsdən düşməmişik. Daha enerjili, yeni qüvvələrlə yarışın içində olacağıq. Hamıya elan edirəm: bu ilki hədəfimiz çempionluqdur. Ən azından mövsümün sonuna qədər çempionluq yarışının içində olmaqdır. Mən hesab edirəm ki, keçən ildən daha güclü, daha dinamik, daha keyfiyyətli "Turan" görəcəyik.

– "Qarabağ"la bacara biləcəksiniz?

– Bacara bilməyəcəyimizi düşünsəydik, bu gün burada olmazdıq.

– Dünən Aziz Yıldırımla görüşdünüz. İstərdik bununla bağlı danışasınız.

– Çox əlamətdar və məhsuldar görüş oldu. "Fənərbaxça" klubu bizim təklifimizi, dəvətimizi qəbul edib. Artıq idarə heyəti Azərbaycanda oyunun keçirilməsi ilə bağlı qərar qəbul edib. Sadəcə, biz çox istəyirik ki, oyun Tovuzda olsun. Amma həm bizə gələn çoxsaylı azarkeş tələbləri, həm də "Fənərbaxça" azarkeşlərinin müraciətləri var. Stadionumuz çox balacadır, tutumunu hələ artıra bilməmişik. Ona görə müzakirələrimiz oldu ki, görüş yerinin Bakıya dəyişdirilməsi mümkün olar, ya olmaz. Bunları müzakirə etdik. Yaxın günlərdə bununla bağlı yekun qərar verəcəyik.

– Ortaq məxrəcə gəldiniz?

– Ortaq məxrəcə gəlmişik. Oyun sentyabrın 20-si ilə oktyabrın 10-u arasında olacaq. Çox istəyirik ki, şəhidlərimizin anım gününə həsr edək. Oradan əldə ediləcək vəsaiti də xeyriyyə məqsədilə fondlara köçürməyi planlaşdırırıq.

– Oyun Bakıda Olimpiya Stadionunda olacaq?