“Yaxşı matç keçirdik. Çətin olsa da, qalib gəldik. 3 xalı gözəl oyunla əldə etdik”.

Futbolmedia.az xəbər verir ki, bu sözləri “Turan Tovuz”un müdafiəçisi Emmanuel Hakman Misli Premyer Liqasının 35-ci turunda “Sumqayıt”ı 1:0 hesabı ilə məğlub etdikləri oyun barədə danışarkən deyib.


Toqolu müdafiəçi jurnalistlərə müsahibəsində bildirib ki, 4-cü yeri təmin etsələr də, mövsümün son matçına da qələbə üçün çıxacaqlar: “Sumqayıt”a qalib gəlməklə 4-cü yeri təmin etdik. Lakin arxayınlaşmırıq. Çempionat hələ bitməyib. Qarşıda daha bir matçımız var. “Kəpəz”lə görüşdə də qələbə qazanaraq azarkeşlərimizi sevindirmək istəyirik”.

Hakmanın sözlərinə görə, avrokuboklara yollanmaq üçün bütün ümidləri “Qarabağ”adır: “Təbii ki, finalda “Qarabağ”ın qalib gəlməsini istəyirik. Yalnız bu halda Konfrans Liqasına yollana bilərik. İnanırıq ki, belə də olacaq”.

30 yaşlı futbolçu “Turan Tovuz”un cari mövsümdəki çıxışından razı qaldınız?” sualını belə cavablandırıb: “Məncə, bundan artığına da nail ola bilərdik. Təəssüf ki, müəyyən səbəblər istəyimizə mane oldu. Xüsusən də aparıcı futbolçularımızın zədələnməsini qeyd etmək olar”.