Misli Premyer Liqasının 25-ci turu çərçivəsində "Sabah" evdə "Sumqayıt"a 3:1 hesabı ilə qalib gəlib.

Futbolmedia.az xəbər verir ki, qarşılaşmadan sonra təşkil olunan mətbuat konfransında paytaxt təmsilçisinin baş məşqçisi Valdas Dambrauskas komandasının nümayiş etdirdiyi oyundan razılığını ifadə edib:

"İlk növbədə futbolçularımı, məşqçilər heyətini, azarkeşləri və rəhbərliyi bu qələbə münasibətilə təbrik edirəm. Asan oyun olmayacağını bilirdik. Adətən fasilə ərəfəsində oyunçuların fikri istirahətdə olur, lakin bu gün komandamın davranışından və oyuna köklənməsindən çox məmnun qaldım. İlk hissədə 1:0 öndə olsaq da, çoxsaylı fürsətlərdən yararlana bilmədik. İkinci hissəyə isə sürətli başladıq və fərqi artırdıq. Hesab 3:0 olanda bir az nəzarəti itirdik və sonda lazımsız qol buraxdıq, amma ümumilikdə bugünkü çıxışımızdan razıyam. Futbolçular 4 günlük fasilədə ailələri ilə istirahəti düşünməlidir. Qayıdandan sonra gümrah olmalı və çempionatın önəmli, son hissəsinə hazırlaşmalıyıq".

Litvalı mütəxəssis qarşıdakı 13-14 günlük fasilə dövründə futbolçulara verəcəyi tapşırıqlardan və fiziki formanın qorunmasından söz açıb:

"Bu müddət üçün xüsusi bir təlimatım olmayacaq. Futbolçulardan sadəcə 3-4 günlük futbolu tamamilə unutmaqlarını istəyirəm. İnanıram ki, hazırda yaxşı formadayıq və komanda geri dönəndə də gümrah olacaq. Özümə gəlincə, mən də bir az dincəlməyə çalışacağam. Açığı, fasilənin olmasını çox da istəməzdim, çünki bu, komandanın ritmdən uzaqlaşmasına səbəb ola bilər. Qayıtdıqdan sonra "Qarabağ"la oyuna ən yaxşı şəkildə hazırlaşacağıq".