"Qalatasaray"ın baş məşqçisi Okan Buruk Çempionlar Liqasının 1/8 final mərhələsinin ilk oyunları çərçivəsində "Liverpul"a qalib gəldikləri matç (1:0) haqqında danışıb.

Futbolmedia.az xəbər verir ki, mütəxəssis görüşdən sonra təşkil olunan mətbuat konfransında Liqa məhələsində də "mersisaydlılar"ı məğlub etdiklərini və bu qələbələrin təsadüfi olmadığını deyib:

"Cari mövsümdə "Liverpul"a 2-ci dəfə qalib gəldik. İlk qələbəmizin təsadüf olmadığını göstərdik. Stadionda möhtəşəm atmosfer var idi. Biz o emosiaları hiss etdik. Birlikdə müdafiə olunduq, birlikdə hücuma atıldıq.

Məncə, bu, Türkiyə futbolu üçün çox vacib bir qələbədir. Ölkənin xal hesabını da artırırıq. Beynəlxalq arenada bir Türkiyə klubunun nələr edə biləcəyini göstəririk. Bu, çox dəyərlidir".

O.Buruk növbəti həftə İngiltərə təmsilçisinə qarşı keçirəcəkləri cavab oyununa da toxunub: "Yuventus"la matçdan sonra da demişdim: Səfər oyunlarımız çox vacibdir. "Yuventus"la görüşdə yaxşı bir təcrübə qazandıq. Bir üstünlük əldə etmişik. Bu gün hesab 2:0, 3:0 da ola bilərdi. Və ya rəqibimiz şansları dəyərləndirsəydi, 1:1, 1:2 də nəticələnə bilərdi. "Liverpul"la səfər oyunu daha fərqli olacaq. Əlimizdən gələnin ən yaxşısını edəcəyik. "Liverpul" çox yaxşı komandadır. Səhvlərimizdən maksium yararlanmağa çalışırlar. İnşallah, 1/4 finala adlayan tərəf biz olarıq".