"Qarabağ"ın prezidenti Tahir Gözel UEFA Çempionlar Liqasının pley-off mərhələsində İngiltərənin "Nyukasl" klubu ilə keçiriləcək qarşılaşmadan öncə jurnalistlərə açıqlama verib.

Futbolmedia.az xəbər verir ki, klub rəhbəri "Qarabağ"ın hazırda Avropanın ən güclü 25 komandası sırasında olmasını "möcüzə" adlandırıb:

“Əvvəla biz bu gün hara qədər irəlilədiyimizi dərk etməliyik. Avropada yüksək liqalarda oynayan 850 komanda var. Onların xeyli hissəsinin büdcəsi bizdən qat-qat yüksəkdir. Avropanın aparıcı futbol ölkələrinin ikinci liqa klublarının da büdcəsi bizimlə müqayisədə yuxarıdır. Demək olar ki, biz 2000-2500 klub arasında ilk “25-lik”dəyik. Bu, doğrudan da möcüzədir. Onların büdcəsinin bəlkə də 10 qat aşağısı ilə bura qədər irəliləmişik. Bu, hamımızda möhtəşəm qürur və özünəinam yaratmalıdır ki, bura qədər gəlmişik”.

Tahir Gözel sıx qrafikdə oynayan Ağdam təmsilçisinin sabah da azarkeşlərə sevinc bəxş edəcəyinə inandığını qeyd edib:

“Son vaxtlar komandamızın çox sıx qrafiki var idi. Şamaxıda, süni örtüklərdə, Qubada, gilin içində, çox ağır oyunlar fiziki cəhətdən futbolçularımızda yorğunluq yaratsa da, indi baxıram ki, “Qarabağ”da motivasiya ən yüksək səviyyədədir. Klubumuz, biz, oyunçularımız sabahkı oyunun önəmini bilirik. Əminəm ki, futbolçularımız içlərində, ürəklərində, bədənlərində ilahi bir qüvvə tapacaqlar. O an gələcək. Necə ki, “Ayntraxt”la qarşılaşmada 65-ci dəqiqədən sonra oyuna diqtə etdik və nəticə qazandıq. Sabah da belə olmasını gözləyirəm”.

Klubun prezidenti iki klubun büdcəsi arasında fərqə toxunub:

“Nyukasl” İngiltərənin ən zəngin klublarından biridir. Büdcəsi 700-750 milyon funt sterlinqdir. Bu bir milyard dollardır. Bizdən 50 qat böyük klubdur. Amma onlar qarşılarında inamlı, hər zamankı kimi hücum futbolu oynayan, şücaətli bir “Qarabağ” görəcəklər. Nəticənin necə olacağını bilmirəm, kimsə də deyə bilməz. Əsas arzum budur ki, xalqımızdan alqış alaq və oyunun keyfiyyəti üstün olsun, dominant futbol oynayaq. Futbolçularımdan xahişim və gözləntim budur. Əlbəttə, biz bura möhtəşəm baş məşqçimiz Qurban Qurbanovun dahiliyi, zəhməti, texniki heyət, məşqçimiz Elçin Rəhmanov, futbolçularımızın əməyi, xalqımızın inanılmaz dəstəyi, Cənab Prezidentimizin dəstəyi ilə gəlmişik”.