"Oyundan sonra üzüldük. Erkən qol buraxdıq, qalib gəlmək istəyirdik. Yaxşı başlamasaq da, sonradan düzgün reaksiya göstərdik, toparlandıq".

Futbolmediaa.az xəbər verir ki, bu sözləri "Ayntraxt"ın baş məşqçisi Dennis Şmitt UEFA Çempionlar Liqasının Liqa mərhələsində "Qarabağ"a Bakıda uduzduqları oyundan sonra mətbuat konfransında deyib.

O, 2:3 hesablı məğlubiyyəti belə şərh edib: "Hər iki komandanın şansları var idi. Fasilədə müəyyən məsələləri danışdıq, taktikanı dəyişdik. Gördük ki, “Qarabağ” 2-ci hissədə pressinq edirdi, hücuma keçirdi. Hesabda irəliyə də keçdik, amma “Qarabağ” dərhal hesabı bərabərləşdirdi. 2:2-dən sonra oyuna nəzarət edirdik. Amma “Qarabağ” yenə hücumlar etdi. Çox çalışdıq ki, intizamlı oynayaq. Bu oyundan pozitiv məqamları götürüb, analiz edəcəyik".

O, “Qarabağ”ın ilk dəfə Almaniya klubunu məğlub etməsinə belə münasibət bildirib: "Mən yalnız öz oyunumuz haqda danışa bilərəm. Biz gördük ki, komanda çox intizamlı oynayırdı, çox istəkli idi. Biz səhvi daha çox etdik və uduzduq".

Şmitt indi komandasının psixoloji dəstəyə ehtiyacı olduğunu qedy edib: "Dərhal bir söz deyə bilmərəm, analizdən sonra danışmaq olar. Sehrbaz deyilik, dərhal nəyisə dəyişə bilmərik. Öz oyunumuzu oynayırdıq. Səhvlər buraxmışıqsa, analiz edəcəyik. Bu məğlubiyyət futbolçuların əhvalını korladı. Onlar psixoloji olaraq narahatdırlar. Amma analizdən sonra pozitiv məqamları nəzərə alıb, fokuslanacağıq ki, qarşıdakı matçlarda Bakıdakı səhvləri buraxmayaq. Potensialımız var".

Komandaya müvəqqəti baş məşqçi təyin edilən mütəxəssis klubdakı taleyi ilə bağlı sualı da cavablandırıb: "Mənim üçün maraqlı deyil şəxsi işimi düşünmək. Əsas işim komandanı toplayıb, növbəti oyuna hazırlaşdırmaq idi. Üç gün vaxtım var idi. Səmərəli istifadə etdik. Göstərdiyimiz oyun da bunu deyir. Şənbə günü də komandanı baş məşqçi kimi meydana mən çıxaracam".

Azərbaycan klubuna məğlubiyyəti Almaniyada böyük faciə ilə qarşılayacaqlar? Baş məşqçinin cavabı belə olub: "Xeyr, faciə deyil. Bura Çempionlar Liqasıdır, bütün komandalar yüksək keyfiyyətlidir. Meydanda iki güclü komanda var idi, hər ikisi mübarizə aparırdı. Uduzmuşuqsa, o demək deyil ki, potensialımız yoxdur".

Dennis Şmitt oyunöncəsi Bakıda məşq etməməklərinin oyunlarına təsiri olmadığını da bildirib: "Bunun oyuna heç bir təsiri yoxdur. Ona görə qərarımızdan peşman deyilik"