"Çox gərgin oyun oldu. Bizdə 19-20 yaşlı uşaqlar inkişaf etməlidir. Onlara təcrübə lazımdır. Oyundan-oyuna onlarda artım gözləyirik".

Futbolmedia.az xəbər verir ki, bu sözləri "Qəbələ"nin baş məşqçisi Kaxaber Sxadadze Misli Premyer Liqasının 2-ci turunda bu gün "Zirə" ilə evdə keçirilən görüşdən sonra mətbuat konfransında deyib.

Gürcüstanlı mütəxəssis 1:2 hesablı məğlubiyyəti belə şərh edib: "Ümumi götürəndə yaxşı oyun oldu. Zamanla daha yaxşı olacağımıza inanıram. Əsas odur ki, meydanda oyunumuz görünürdü. Qol vurmaq imkanlarımız oldu. Həmin epizodları təcrübəsizliyə görə qola çevirə bilmədik. Növbəti matçlarda daha yaxşı oyun nümayiş etdirə biləcəyik".

K.Sxadadze heyətin daha da gücləndirilməli olduğunu bildirib: "Bəli, heyətdə kasadlıq var. Bu işlə rəhbərlik məşğul olur. Biz əlimizdə olan heyətlə işləyirik. Əlbəttə ki, "Zirə" ilə müqayisə etsək, bizim imkanlarımız daha azdır. İstərdik ki, çoxlu oyunçularımız olsun".

"Qəbələ"nin çalışdırıcısı ki, futbolçularının təcrübə sarıdan əziyyət çəkdiklərini əlavə edib: "Eşqin Quliyevin yerində təcrübəli futbolçu olsaydı, o qərarı verməzdi. Amma Eşqin çox perspektivli oyunçudur. Ona inanırıq. "Zirə"nin müdafiəçiləri sadə oynayırdılar. Bu da onların təcrübəli olduğunu göstərir. Bu gün futbolçular çox çalışdılar. Amma nəticə belə oldu. Həyat davam edir. Gənc oyunçuların özlərinə inamı olmalıdır. Gənclərlə işləməyə davam edib legionerlərdən də çox şey tələb etməliyik. "Zirə" uzun müddətdir bir yerdə çıxış edən komandadır. Rəşad Sadıqov da xeyli zamandır orada işləyir. Komanda 2 ildir avrokuboklarda iştirak edir".