"Bizim üçün yaxşı oyun oldu. Əvvəldən sona qədər nəzarət bizim tərəfimizdə idi. Şanslar zamanı daha konsentrasiyalı olmalı və ötürmələri daha tez etməliyik. Hesaba görə o qədər də emosiyalarım çox olmadı. Bu inamı mənə futbolçularım verib. Meydana çıxma formaları məndə inam yaratdı. Bu cür davam etməliyik. Artıq ikinci oyundur, eyni heyətlə çıxış edirdik. Bu, komanda üçün çox müsbət haldır. Belədə, bir-birlərini daha yaxşı tanıyırlar və oyunumuz yaxşılaşmağa doğru gedir".

Futbolmedia.az xəbər verir ki, bu sözləri "Neftçi"nin baş məşqçisi Laurentsiu Regekampf Misli Premyer Liqasının 21-ci turunda "Sumqayıt"a qalib gəldikləri matçdan (2:0) sonra keçirilən mətbuat konfransında deyib.

Regekampf rəqibin çalışdırıcısı Samir Abasovun oyundan sonra səsləndirdiyi fikirlərə də toxunub. S.Abasov öz komandasının "Neftçi"dən daha yaxşı çıxış etdiyini bildirib. Regekampf isə deyib: "Buna nə cavab verim? Belə sözləri şərh edə bilmərəm. Oyuna baxmalı və nəticəni görməlisiniz. Bu, onun fikridir və hörmətlə yanaşmalıyıq".