"Sumqayıt"ın baş məşqçisi Vaqif Cavadov Misli Premyer Liqasının 31-ci turunda "Zirə"yə 1:3 hesabı ilə uduzduqları oyunu şərh edib.

Futbolmedia.az xəbər verir ki, o, matçdan sonra keçirilən mətbuat konfransında deyib:

– Çox yaxşı komandaya qarşı mübarizə apardıq. Həmin komanda elə-belə olaraq ikinci yerdə deyil. Bunun şahidiyik. Amma "Sumqayıt" komandasında yaxşı oyun nümayiş etdirdi. Futbolçularıma təşəkkürümü bildirirəm. Hər iki komanda bu gün futbol oynadı. Hər iki komandanın oyun üslubları görsənirdi. İnanıram ki, bizim komanda da bu matçlarla daha möhkəm olacaq. İnşallah, növbəti oyunlar da bu cür olsun. "Zirə"yə uğurlar arzulayıram. Bizim isə çətin oyunlarımız var. Onlara hazırlaşacağıq.

– Yerli futbolçuların bu cür səhvlərini gördükdən sonra düşünmürsünüz, nə yaxşı, növbəti mövsüm legioner limiti tətbiq olunmayacaq?

– Düşünmürəm. Heç kim istəməzdi ki, oyuna 6-7 dəqiqə qalmış bu cür səhv buraxsın. Bizim həmin ərəfədə üstünlüyümüz və qol imkanlarımız var idi. Belə bir epizodda səhv buraxdıq. İstər yerli, istər əcnəbi futbolçu olsun, mənim üçün eynidir. Hamısına güvənirəm. Ümidvaram ki, növbəti oyunlarda belə səhvlərə yol vermərik. Ən azından bu istək və ruh, meydanda nə etdiklərini bilməkləri mənim üçün çox önəmlidir. Çox istəyərəm ki, bu cür epizodlarımızın sayı az olar və növbəti görüşlərdə fürsətlərimizdən istifadə edək.