"Sumqayıt"ın baş məşqçisi Vaqif Cavadov Misli Premyer Liqasının 28-ci turunda "Sabah"la 3:3 hesablı heç-heçə etdikləri matçı şərh edib.

Futbolmedia.az xəbər verir ki, o, görüşdən sonra keçirilən mətbuat konfransında deyib:

- Çox yaxşı oyun oldu. İki fərqli hissə izlədik. Hər iki komanda qalib gələ bilərdi. Amma məncə, 3:3 ədalətli nəticə idi. "Sabah"a uğurlar arzulayıram. Biz də yolumuza davam edəcəyik.

- 3 oyun, 8 qol... Qolsuz seriyadan sonra nəyi dəyişdiniz?

- Böyük dəyişiklik yoxdur. Sadəcə olaraq futbolçulara özünəinam gəldi və qol epizodlarından daha yaxşı istifadə edirik. Ona görə də qollar vururuq. Komandama təşəkkürümü bildirirəm. İkinci oyundur ki, xarakter göstəririk və məğlub durumdan çıxa bilirik. Futbolçularıma güvənirəm.

- Mehdi Cənnətovun performansını necə dəyərləndirirsiniz?

- Bir neçə kritik epizodda komandanı qoldan xilas etdi. Bütün futbolçularıma təşəkkür edirəm. Komandanın istəyi, ruhu çox önəmlidir. İnanıram ki, növbəti oyunlarda da bunu görəcəyik.