“Fənərbaxça”nın vitse-prezidenti Acun Ilıcalı əzəli rəqibləri “Qalatasaray”ı ittiham edib.

Futbolmedia.az xəbər verir ki, o, Superliqada dünən “Hatayspor”a qalib gəldikləri (2:1) oyundan sonra türkiyəli jurnalistlərə açıqlama verib.

Ilcalı hakimlərin komandasına təzyiq etdiyini bildirib: “Göztepe” və “Eyüpspor”la matçlarda penaltimiz verilsə idi indi aramızdakı (“Qalatasaray”la - red.) xal fərqi 4 idi (indi 8-dir). Rəqib komandanın xal itirdiyi oyun yoxdur. Onlar üsyan edirlər, federasiya ilə məhkəmədədirlər. Amma neçə xal itiriblər? Sıfır. Biz 4 xal itirmişik.

"Qalatasaray” öz meydanında nə vaxt qırmızı vərəqə alıb? Dünya çempionatından əvvəl. 2,5 ildir qırmızı vərəqə görməyiblər. Bu, bir komediya filmidir. “Qalatasaray”ın qırmızı vərəqə almalı olduğu 4-5 matç var. Baş məşqçimizin əhvalı çox pisdir. O sual edir ki, bizim rəqibimiz kimdir?”

Ilıcalı iddia edib ki, “Qalatasaray” açıq-aşkar irəli çəkilir.

Klub rəsmisi bildirib ki, hazırda Türkiyə futbolunda ədalət yoxdur, hakimlik isə bitib, torpağa basdırılıb. Ilıcalı xarici hakim istədiklərini də deyib.