“Mançester Yunayted”in sabiq qapıçısı Peter Şmeyxel komandanın “Çelsi”yə 0:2 hesabı ilə məğlub olduğu oyundan sonra müdafiəçi Lisandro Martinesi tənqid edib.

Argentinalı futbolçu Premyer Liqanın 9-cu turu çərçivəsində keçirilən qarşılaşmada 50-ci dəqiqədə Morqan Rocersin qol vurmasına mane ola bilməyib. O, həmçinin, 59-cu dəqiqədə Rocersə qarşı qayda pozuntusuna görə sarı vərəqə və 63-cü dəqiqədə isə Uesli Fofananın üzünə zərbə endirdiyi üçün “qırmızı” ilə cəzalandırılıb.

Futbolmedia.az xarici KİV-ə istinadən xəbər verir ki, Şmeyxel, müdafiəçinin çıxışını sərt sözlərlə tənqid edib:

“Bu məğlubiyyətə görə bütün günahı Lisandro Martinesin üzərinə qoyuram. Onun bu oyundakı çıxışı tam bir rüsvayçılıqdır.

İki həftə əvvəl o, komanda yoldaşları və klub haqqında çox sərt fikirlər səsləndirmişdi. Elə təəssürat yaranırdı ki, sanki özünün klubdan ayrılmasını təmin etməyə çalışır. O, “Mançester Yunayted” səviyyəsində oyunçu deyil. Bu gün bunu bir daha sübut etdi”.

“Çelsi” ilə oyundakı məğlubiyyətdən sonra “Mançester Yunayted”in bütün turnirlərdə qələbə qazana bilmədiyi matçların sayı 9-a yüksəlib. Komanda bu müddətdə 6 dəfə uduzub və 3 dəfə heç-heçə edib. Bu, klubun 1988-ci ildən bəri ən uğursuz seriyasıdır.