“Çox vacib oyuna çıxacağıq. Rəqibin açıqlamalarından da görünür ki, çox inamlıdırlar, bizə qalib gəlməyə ümid edirlər. Bu onların öz gücünə inanmasından irəli gəlir. Əlbəttə ki, biz də çox istəkliyik”.

Bunu “Qarabağ”ın baş məşqçisi Qurban Qurbanov Konfrans Liqasının pley-off mərhələsində “Aberdin”lə keçiriləcək ilk oyun öncəsi deyib.

Təcrübəli mütəxəssis sabah Tofiq Bəhramov adına Respublika stadionunda baş tutacaq qarşılaşmaya hazır olduqlarını söyləyib: “İlk oyunda evdə olmasına baxmayaraq, hər şeyə cavab matçında aydınlıq gələcək. Sabah cərimə meydanında istədiklərini yerinə yetirməmələrinə diqqət etmək lazımdır. Futbolçularımız rəqibi yaxından tanıyırlar. Son vaxtlar oyunçular çox istəklidirlər. Sabah daha artığını etmək lazım olacaq. Meydanda daha mübariz oyun ola bilər, nəinki baxımlı çıxış. Buna hazırlaşırıq. Çox səbrli olmalıyıq ki, rəqibin verəcəyi boşluqlardan istifadə edək və biz də boşluq verməyək”.

- “Aberdin”in ən təhlükəli silahı nədir?

- Fiziki göstəricilərdə yaxşıdırlar, standart vəziyyətlərdə təhlükəlidirlər. Topla davranmağı xoşlayırlar. Çox rahat qol vurmaq bacarıqları var. Bəzən heç nədən qol epizodu yarada bilirlər. Mübarizə aparmağı xoşlayırlar. Hər şeydə diqqətli olmalıyıq. Hər epizoddan maksimum yararlanmağı bacarırlar. Bütün komponentlərdə diqqətli olmalıyıq.

- Stadionun ot örtüyünün durumu sizi qane edir?

- AEL-lə oyundakından yaxşı olmayacaq. Çox istərdik ki, yaxşı meydanda oynayaq. Çox nüanslar buna mane olur. Topla davranmaqda çətinlik çəkəcəyik. Rəqibin digər üstün cəhətləri var. Hava toplarından yaxşı istifadə edirlər. Bunun qarşısını almağa çalışacağıq.

- “Aberdin”in baş məşqçisi martda ABŞ-dan gəlib. Bu, sizə üstünlük verə bilər?

- Bu gün dünya futbolu inkişafdadır. Onlar futbolun içində böyüyürlər. Avropada işsiz qalanlar ora gedirlər. Rəqibin baş məşqçisi cavandır, istəklidir. Hər rəqibə qarşı fərqli oyun üslubu var. Oyunun gedişində ciddi rotasiyalar edir. Futbolçular həddən artıq diqqətli olmalıdırlar. Bunların hamısını təhlil etmişik. Təkcə mübarizə aparmaq yox, düşünmək də vacib olacaq.

- Sizcə, “Aberdin” sabah hansı sistemdə oynayacaq?

- Onu deyə bilmərəm. Aşağı-yuxarı hansı sistemlə oynasa, meydanda 11-11-ə qarşı çıxış edirsən. Eyni sistemdə oynayan komandaya qarşı 3-4 oyun keçirsən, ona qarşı oynamaq daha rahat olur. İnşallah, sabah daha çox hücum edən tərəf olmağa çalışacağıq.

- “Aşdod”, AEL və “Aberdin”dən hansı daha maraqlı və güclüdür?

- Buna cavab vermək bəlkə də düzgün çıxmazdı. Amma hər birinə qarşı çətinliklərimiz oldu. Müqayisə etmək çətindir. Hamısı ciddi rəqib idi. Hərəsinin öz oyun fəlsəfəsi var. Onlara qarşı düzgün hazırlaşdıq. Ola bilər ki, “Aberdin” bir az üstündür. Amma o birilərini də zəif saymıram.

- Bu mövsüm oyunlarda cəmi 1 qoldan çoxunu vura bilməməyiniz sizi narahat etmir?

- Çox qol vurmaq istərdik. Biz azarkeş üçün oynayırıq. Azarkeş qələbə ilə yanaşı, qollardan da həzz alır. Qarşımızda duran rəqib də boşluq vermir ki, istədiyimiz qədər qol vura bilək. Bizə qarşı bütün rəqiblər həddən artıq ciddi yanaşır. Bu, bir tərəfdən sevindirsə də, işimizi də çətinləşdirir. Əvvəllər bizi çox ciddiyə almırdılar, bu da meydanda işimizi asanlaşdırırdı. Çox qol vurmağı özüm də xoşlayıram. Futbolçularımın daha yaxşı performans sərgiləməsini və çox qol vurmalarını istərdim. Ancaq belə turnirlərdə qol buraxmamaq da çox vacibdir. Bu üzdən həm hücumda, həm də müdafiədə oynamaq önəmlidir.

- Azarkeşlər həm sizin, həm də komandanın təcrübəsinə böyük ümid bəsləyir. Sabahkı oyunda qələbəyə söz verə bilərsiniz?

- Heç vaxt söz verməmişəm ki, mütləq qalib gələcəyəm. Həmişə söz vermişəm ki, komandam yaxşı mübarizə aparacaq. Qalibiyyət üçün ən yaxşısını etməyə çalışacağıq. Mən də futbolçularıma güvənərək deyirəm ki, sabah azarkeşlər oyundan razı qalacaqlar.

- AEL-lə oyunda Borqes meydana çıxdıqdan sonra komandada canlanma yarandı. Həmçinin Riçard Almeyda da gündən-günə artırır. Onları sabah start heyətində görə bilərik?

- Təkcə gündən-günə yox, oyundan-oyuna da artırmaq lazımdır. Hər ikisini meydanda görə bilərik. Daha yaxşı səviyyəyə gəlib çıxıblar.

- Hücumçu axtarışlarınız hansı mərhələdədir?

- Ən pik mərhələdədir. Çox axtarırıq, danışıqlar gedir. Tezliklə müsbət də ola bilər. Konkret cavab gözlədiyimiz bir neçə oyunçu var. Bu, təkcə hücum yox, müdafiə və yarımmüdafiə mövqeyinə də aiddir. Bəzən düşünmədiyimiz elementlər ortaya çıxır, danışıq yarımçıq qalır.

- Necə olur ki, kasıb “Şerif”ə samballı hücumçu gəlir, Azərbaycan klublarına gəlmir?

- Bu suala cavab vermək bəlkə çətin olacaq. “Şerif” illərdir legionerlərə üstünlük verir. Hər il 15-20 legionerləri olub. Bizim özümüzdə də xeyli sayda bacarıqlı legionerlər olub. Yəqin ki, avrokuboklardakı nəticələrinə görə deyirsiniz. Neçə illər idi ki, pley-offa düşə bilmirdilər. Hər bir komandanın pik nöqtəsi olur. Ola bilsin ki, “Şerif” bu mövsüm həmin dönəmdədir. Bizə oyunçu gəlmə məsələsində problem olur. Azərbaycana gəlmək istəyən legioner azdır. Əvvəllər həddən artıq çox oyunçu əldə edə bilirdik, təkliflər gəlirdi. Bu say get-gedə aşağı düşür. 5-6, hətta 10 legioneri olan klubumuz var. Bəzən bizdən, digər klublarımızdan asılı olmayan məqamlar olur. İstənilən halda ən yaxşısını etməyə çalışırıq.

- Ailton Silva ilə maraqlanırsınız?

- Belə bir danışığımız olmayıb