Azərbaycan futzal yığmasının baş məşqçisi Vitali Borisov DÇ-2024-ün elit-raund mərhələsi çərçivəsində Bakıda Rumıniya ilə 5:5 hesablı heç-heçə etdikləri matç haqqında danışıb.

Futbolmedia.az xəbər verir ki, o, jurnalistlərin suallarını cavablandırmazdan əvvəl komandasının yaxşı çıxış etdiyini deyib:

- Uşaqlar çox yaxşı oynadılar. Matç bizim nəzarətimiz altında keçdi. Rumıniya müdafiədən oynayırdı. Bütün oyunu öndə idik. Sadəcə təcrübəmiz çatmadı. Rumıniya say üstünlüyü ilə daha yaxşı oynayır. Komandada 80 faiz yeni oyunçularımız var. Futzalçılardan çox razı qaldım.

- Bəs yeni younçulardan razı qaldınız?

- Bəli. Hamısından.

- Qapıya gedən həlledici zərbələr Rövşən Hüseynli üçün əlçatmaz oldu...

- Bəlkə birinci qolu xilas edə bilərdi. Amma 5-4-ə oynayanda rəqibdə bir oyunçu artıq olur. Rövşəndən də razı qaldım. Rəqibin say üstünlüyü çox olanda, çətindir. Rövşənin səhvini görmədim. Amma analizə baxacağam.

- Braziliyalılarla bağlı milliləşdirmə problemi var. Bu prosses davam etsə, bizi çətin dövr gözləyir? Çünki onlarsız çox çətin görünür...

- Bizdə də braziliyalılar oynayırdı. Edu qırmızı vərəqəyə görə yox idi, bir-iki nəfər zədəli idi. Kimin sənədinin düz olub-olmamasını rəhbərlik bilir. Yenidən başlamaq lazımdırsa, vaxt aparacaq. Gənclərimiz azdır. Proses əlbəttə vaxt aparmalıdır.