"Qarabağ"ın baş məşqçisi Qurban Qurbanov sabiq futbolçusu Kadi Borgesin Ağdam təmsilçisinə qayıdıb-qayıtmayacağı barədə danışıb.

Futbolmedia.az xəbər verir ki, o, Avropa Liqasının qrup mərhələsinin 6-cı turunda "Hekken"ə qalib gəldikləri matçdan sonra təşkil olunan mətbuat konfransında "Krasnodar"da çıxış edən hücumameyilli yarımmüdafiəçi ilə danışıqlar aparmadıqlarını deyib:

"Bizim onunla heç bir danışığımız olmayıb. Buradan gedən futbolçuların hamısına demişik ki, "Qarabağ"ın qapısı üzünüzə həmişə açıqdır. Deyim ki, inşallah geri qayıdar, düz çıxmaz. O daha da böyümək üçün qarşısına məqsəd qoyub. "Qarabağ"da hər şey onun üçün yaxşı idi. Belə variant olsa, biz yox demərik. Amma hazırda müqaviləsi var, özü də böyük. Gələcək göstərər".

Qeyd edək ki, Kadi Borges 2021-ci ilin yayından “Qarabağ”da oynayırdı. O, ötən qış fasiləsində 5 milyon avroya “Krasnodar”a transfer olunub.

Əlavə edək ki, "Qarabağ" Avropa Liqasının qrup mərhələsində 6 oyuna 10 xal toplayıb və 2-ci yerin sahibi kimi pley-offa vəsiqə qazanıb.