“Çox vacib qələbə qazandıq. Oyun bizim üçün çətin alındı. İki qol vurduqdan sonra üçüncü qolu da vura bilmədik. Əsas olan qələbədir. Qarşıda çox önəmli görüşlər var. Həmin matçlara hazırlaşacağıq”.

Futbolmedia.az xəbər verir ki, bu sözləri “Sabah”ın baş məşqçisi Murad Musayev Misli Premyer Liqasının 15-ci turunda səfərdə "Kəpəz"ə qalib gəldikləri oyundan (2:0) sonra keçirilən mətbuat konfransında deyib.

- "Sabah" heç vaxt Tovuzda məğlub olmayıb. Amma oyun olaraq komanda o qədər də yaxşı görünmürdü. Burada qələbə qazanmağın düsturu budur ki, yaxşı oynamasaz da, qalib gələsiz?

- Tovuza gələrkən, özümüzdən çox da yaxşı oyun gözləmirik. Vacib olan qələbə qazanmaqdır. Burada oynamaq çox çətindir. Süni örtükdə oynamaq çətindir. "Qarabağ" da burada parlaq oyun göstərməyib. Çünki rəqib arxaya oturur. "Kəpəz" hücum futbolu oynayandır, rəqibə də hücum etməyə imkan verir. “Turan Tovuz” son dəfə burada bizimlə hücuma yönəlik futbol oynamışdı. Çətindir. Ən önəmlisi bu meydanda qələbə qazanmaqdır.

- Bu gün yenə sarı vərəqə aldınız. Hakimlər, yoxsa Murad Musayev geriyə addım atacaq?

- İki ildir buradayam. Hakimlikdən heç də məmnun deyiləm. "Qarabağ"la oyunda Aleksey İsayevin ayağını əzirlər, heç bir qayda pozuntusu qeydə alınmır. Marko Yankoviç Namik Ələskərova qarşı kobud oynayır, ama heç televizorda da göstərmirlər. Maruan Hadudinin əlinə dəyən topu isə tez gördülər. “Zirə” ilə oyunda Namiki üzündən vururlar, heç nə yoxdur. Emmanuel Apehə iki sarı vərəqə göstərdilər və meydandan qovdular. Bu, mənim işimdir. Mən işimlə yaşayıram. Futbol balet deyil. Hər toxunuşda foulu verirlər. Avropada belə deyil. Bu hakimlik dəyişsə, mən sarı vərəqə görmərəm. Hesab edin ki, böyük zəhmətlə özünüzə ev alırsız və kimsə əlinizdən alır. Hakimlər qələbəmizi əlimizdən alırlar. Avropada 35 oyunum olub, cəm bir dəfə sarı vərəqə görmüşəm. Hazırda hakimlər çox müdafiə olunur. Amma məşqçilərə dərhal cəza verirlər.