"Rəqibi yaxşı oyuna görə təbrik edirəm. Oyunumuz istədiyimiz kimi alınmadı. Son vaxtlar sıx qrafikdə oynayırıq. Oyunçulara deyəsi bir şey yoxdur. Səhvlərimiz oldu. Bəzən düşünmədiyimiz, istəmədiyimiz nəticələr olur. Qarşıda bizi vacib oyun gözləyir. Hər şeyi qaydasına salmalıyıq ki, “Olimpiya” ilə cavab matçında istədiyimiz nəticəni qazanaq"

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov Misli Premyer Liqasının 4-cü turunun "Kəpəz"lə (1:1) oyunundan sonra mətbuat konfransında deyib.

O, "Yurqorden"də çıxış edən oğlu Musa Qurbanlının İsveç çempionatının 21-ci turunda "Deqefors"la matçda iki qol vurub, bir qol ötürməsi verməsi ilə bağlı söyləyib: "Xəbərim var idi ki, bu gün oyunu var. Etdikləri sevindirici haldır, buna ancaq sevinirəm. Düzü, oyuna baxmamışam. Çalışacam ki, sabah izləyim. Təkcə oğlumdur deyə yox, azərbaycanlı kimi uğur əldə edəcəksə, buna çox sevinəcəm".

Mütəxəssis UEFA reytinqində Azərbaycana daha çox xal gətirən komandanın "Qarabağ" olması ilə əlaqədar fikrə belə münasibət bildirib: "İnanıram ki, ölkə adına qazanacağımız xalların sayı çoxalar. “Sabah” klubu bu mövsüm az xal qazanmadı. Oyunlarımız çox oldu, qələbələrimiz oldu və xallar qazana bildik. Qarşıdakı illərdə daha yaxşı nəticə əldə edə bilərik. Klublarımızın sayı çoxalır və onlar inkişaf edirlər".

Q.Qurbanov Luka Quqeşaşvilinin komandadan ayrılacağı, Kadi Borgesin icarə əsasında geri qayıdacağı xəbərlərini də şərh edib: "Məndə belə məlumat yoxdur. Kadi ilə danışığımız olmayıb. Qapıçı məsələsi ilə bağlı da bir şey yoxdur".

Baş məşqçi "Zirə"nin hazırda 4 ardıcıl qələbə ilə lider olması haqda da danışıb: "Zirə"nin lider olmasına sürpriz deməzdim. Buna sevinirəm. Çünki orada tanıdığım insanlar, məşqçilər var. Onların nə qədər əziyyət çəkdiyini görürəm, bilirəm. Rəşad Sadıqov da birincilərdəndir. "Zirə" rəhbərliyi və Rəşad Sadıqov futbolumuza, idmanımıza daha çox fayda vermək haqda düşünürlər. Bəzən çox şeyə sürpriz kimi baxmıram. Çünki bütün ölkələrdə, çempionatlarda komandalar ancaq inkişafa doğru gedir. Hamı oturur, düşünür, hazırlaşır. İstənilən oyunda istənilən nəticə ola bilər. Sevinirəm, "Zirə"yə və Rəşad Sadıqova uğurlar arzulayıram. Çempionat yeni başlayıb. Görünən odur ki, qarşıda maraqlı nəticələr çox olacaq".

O, komandasının ölkə çempionatında 4 oyuna 7 xal toplaması ilə əlaqədar deyib:" Normaldır. Əvvəl daha yaxşı nəticələrimiz ola bilər. Amma situasiyanı nəzərə almalıyıq. Futbolçular üzərinə böyük yük düşür. İki gün səfərdə, iki gün burda... Adaptasiya ilə bağlı problemlər olur. Məşq prosesləri pozulur, istər-istəməz hazırlıqda disbalans olur. Bəzən belə xal itkilərinə sevinirəm. Futbolçular bundan sonra daha ciddi hazırlaşmalı olur".