Ötən gün Portuqaliya millisinin baş məşqçisi vəzifəsindən istefaya göndərilən Fernando Santuş yığmadan ayrılmasından danışıb.

Futbolmedia.az "Record"a istinadən xəbər verir ki, mütəxəssis daim milliyə azarkeşlik edəcəyini deyib: “Yığma komandadan təmiz ürəklə ayrılıram. Millinin baş məşqçisi olmaq qürurlandırıcı bir şeydir. Millini çalışdırmaqla məqsədimə nail oldum. Bu müddət ərzində birlikdə çalışdığım bütün oyunçulara təşəkkür etmək istəyirəm. Mən həmişə komandanın qələbə qazanmasına kömək edə biləcək qərarları rəhbər tutmuşam. İndi mən millini dəstəkləyən milyonlarla azarkeşdən birinə çevriləcəyəm”.

Qeyd edək ki, 68 yaşlı mütəxəssis 2014-cü ildən Portuqaliya yığmasının baş məşqçisi idi. Portuqaliya millisi Santuşun rəhbərliyi ilə Avro-2016-nın, 2019-cu ildə isə UEFA Millətlər Liqasının qalibi olub. Komanda dekabrın 10-da DÇ-2022-nin 1/4 finalında Mərakeşə uduzaraq (0:1) turnirdə mübarizəni dayandırıb.