“Biz hələ heç nə qazanmamışıq. Təbii ki, qələbəyə sevinirəm, amma bu oyunu unutmalıyıq. Kanada çox yaxşı komandadır. Bu əhval-ruhiyyəni qorumalıyıq. Biz heç nə etməmişik, hələ pley-offa çıxmamışıq, amma bunu bacarmaq istəyirik".

Futbolmedia.az xəbər verir ki, bu sözləri Mərakeş millisinin baş məşqçisi Valid Reqraqi DÇ-2022-nin qrup mərhələsinin 2-ci turunda Belçikaya 2:0 hesabı ilə qalib gəldikləri oyunu şərh edərkən deyib.

O, daha sonra bildirib: "Hazırlıq səviyyəsinə, futbolçuların fərdi ustalığına görə bizdən üstün olan komandaların olduğunu etiraf edirik. İlk hissədə rəqibin üstünlüyünü qəbul edib müdafiə olunduq. İrəli gedib bizi çətinlik yaratmaq qərarına gəldilər. Taktiki cəhətdən bu, çox yüksək səviyyəli oyun idi.

Məni dəli adlandıra bilərsiniz, amma ilk qolumuz ləğv ediləndə sevindim. Bilirdim ki, bu, Belçikanı daha böyük istəklə məğlub etməyimizə səbəb olacaq. Biz tez-tez topu itirirdik. İkinci hissədə isə topa sahib olmaqada daha yaxşı idik".

Qeyd edək ki, Mərakeşin 45+2 dəqiqədə vurduğu qol VAR-a baxıldıqdan sonra ləğv olunub.