“Bu matçda qalib gəlmək bizim üçün çətin oldu, çünki Meksika yaxşı oynayır. İlk hissədə gərgin idik, ikinc hissədə isə sakitləşib özümüzə gəldik".

Futbolmedia.az xəbər verir ki, bu sözləri Argentina millisinin kapitanı Lionel Messi DÇ-2022-nin qrup mərhələsinin 2-ci turunda Meksikaya 2:0 hesabı ilə qalib gəldikləri oyunu şərh edərkən deyib.

Sözügedən matçda komandasının ilk qolunun müəllifi olan, ikinci qolun ötürməsini verən 35 yaşlı hücumçu daha sonra bildirib: "Səudiyyə Ərəbistanın qarşı ilk oyundakı məğlubiyyətə şəraitlə bağlı bir çox amil səbəb oldu. Amma bu, başqa hekayədir. Bilirdik ki, bu matçda qalib gəlmək lazımdır. Bizim üçün əsl dünya çempionatı başlayır.

İndi dayanmaq olmaz. Hər növbəti matç finaldır, səhvlər yolverilməzdir. Biz necə olmalı idiksə, elə də oynadıq. Belə şəraitdə oynamaq çətin olsa da, nəticə əldə etməyə borclu idik. Oyuna start heyətdə başlayanlar da, sonradan meydana çıxanlar da özlərini sübut etdilər.

Qarşıda daha bir qarşılaşma var. Biz buna öyrəşirik, amma hələ bu istiqamətdə uzun yolumuz var".

Qeyd edək ki, Argentina DÇ-2022-də qrup mərhələsinin son turunda noyabrın 30-u Polşa ilə qarşılaşacaq. Hazırda C qrupunda Polşa 4 xalla 1-ci, Argentina 3 xalla 2-ci, Səudiyyə Ərəbistanı 3 xalla 3-cü, Meksika 1 xalla sonuncudur.