"Komandamın oyunundan qürur duyuram. Avroliqada son oyuna qədər qrupdan çıxmaq üçün şansımızı saxlayırdıq. Sona qədər mübarizə apardıq. Belə oyunların taleyini detallar həll edir. Qol vəziyyətləri yaratsaq da, istifadə edə bilmədik. Bununla belə, komandamla fəxr edirəm".

Futbolmedia.az xəbər verir ki, bu sözləri "Qarabağ"ın futbolçusu Kadi Borges Avropa Liqasının qrup mərhələsinin sonuncu turunda evdə "Frayburq"la 1:1 hesabı ilə heç-heçə etdikləri oyundan sonra jurnalistlərə açıqlamasında deyib.

O, son iki matçda qeyri-dəqiqlik nümayiş etdirməsinin səbəbi ilə bağlı verilən sualı belə cavablandırıb: "Bu suala necə cavab verəcəyimi bilmirəm. Bəlkə də texniki səbəblərə görə qol vurmaq alınmadı, bəlkə də bəxtsizlik oldu. Bunu sizə tam izah edə bilmərəm. Oyunda yanlış qərar vermək sonda rəqibin qol vurması ilə nəticələnir. Ona görə çıxış yolu öz üzərində çalışmaqdır".

Kadi daha sonra bildirib: "Çempionlar Liqasında qrupa düşəcəyimiz, həmçinin Avropa liqasında pley-offa çıxacağım halda "Barselona" bizə rəqib ola bilərdi. Amma reallıq Konfrans Liqasıdır. Orada da zəif rəqib yoxdur. Görək, bəxtimizə hansı komanda düşəcək. Ona əsasən hazırlaşacağıq".