"Ferentsvaroş"un (Macarıstan) futbolçusu Balint Veçsey Çempionlar Liqasının 3-cü təsnifat mərhələsində "Qarabağ"a evdə uduzaraq (1:3, ilk oyun - 1:1) mübarizəni dayandırmaları haqqında danışıb.

Futbolmedia.az magyarnemzet.hu-ya istinadən xəbər verir ki, o, buraxdıqları erkən qolun bütün planları korladığını deyib: “Qarabağ"la oyun planlaşdırdığımız kimi olmadı. Oyunun əvvəlindəki erkən qol ssenarini yenidən yazdı. Amma o halda belə dağılmamalı idik. Bu matçı dəyişmək üçün bir çox elementlər çatışmırdı. İkinci hissədə daha çox risk etdik, daha çox irəli getdik. Amma təəssüf ki, rəqib əks-hücumlarından yaxşı istifadə etdi".

Yarımmüdafiəçi bildirib ki, "Qarabağ"ın ən xırda səhvləri belə cəzalandıracaq futbolçuları var: "Əslində indiyə qədər də ciddi qarşılaşmalarımız olub və onları həll edə bilmişik. Bilirdik ki, "Qarabağ"ın ən kiçik səhvi belə cəzalandıracaq futbolçuları var. Biz isə kifayət qədər böyük səhvlərə yol verdik. Onlar da bundan istifadə etdilər. Matçda yuxuya getdik. topu yavaş ötürürdük. Topa sahib olduqdan sonra da sürətli keçidlərin icrası praktiki olaraq uğursuz alındı. Topla yavaş davrandıq və rəqibi “sındıra” bilmədik. İkinci hissədə bunu yaxşılaşdırmaq istədik, alınmadı".

Futbolçu Avropa Liqasının qrup mərhələsinə düşmək istədiklərini vurğulayıb: "Evdə uduzaraq mərhələ adlaya bilmədiyimiz üçün məyus olduq. Bu, çox ağrıdır. Biz təslim olmayacağıq, sabahdan artıq növbəti oyuna hazırlaşırıq. Avropa Liqasının qrup mərhələsinə düşmək istəyirik. Ən azı son 3 ildə buna nail olmuşuq. Biz indi bundan pis nəticə göstərmək istəmirik".

Qeyd edək ki, mübarizəni Avropa Liqasında davam etdirəcək “Ferensvaroş” pley-off mərhələsində İrlandiya klubu “Şemrok Rovers”lə qarşılaşacaq. “Qarabağ” isə Çempionlar Liqasının pley-offunda Çexiya “Viktoriya”sı (Plzen) ilə üz-üzə gələcək.